25—26 апрель кунлари Қозоғистоннинг Е.А.Букетов номидаги Караганда давлат университетида ташкил этилган «Хорижий тиллар бўйича халқаро талабалар олимпиадаси»да СамДЧТИ талабалари хитой тили бўйича I ўринни, немис тили бўйича II ўринни, француз ва инглиз тиллари бўйича III ўринларни қўлга киритди. Бу ҳақда Zarnews хабар қилади.
Германия, Туркия, Россия Федерацияси, Хитой, Қирғизистон ва Қозоғистоннинг 35 та университетларидан 200 нафар иштирокчи қатнашган халқаро олимпиадада Ўзбекистондан Самарқанд давлат чет тиллар институтининг қуйидаги талабалари муваффақиятли иштирок этди:
Ҳамдамова Чарос Ҳамдамовна – таржима назарияси ва амалиёти факультети, хитой тили йўналиши 4-курс талабаси.Сундеев Виктор Сергеевич – роман-герман тиллари факультети, немис тили йўналиши 2-курс талабаси.Куртова Александра Александровна – роман-герман тиллари факультети, француз тили йўналиши 4-курс талабаси.Аслиева Шаҳзода Зафаровна – инглиз тили факультети 3-курс талабаси.
Германиянинг халқаро Академиклар Алмашинув Хизмати (DAAD), Гёте Институти ва Франциянинг Караганда шаҳридаги Француз Альянси билан ҳамкорликда ташкил этилган халқаро олимпиада доирасида хорижий тилларни ўқитиш методлари бўйича халқаро доирадаги мастер-класс ва давра суҳбати ташкил этилди. Унда СамДЧТИ инглиз тили II факультети декан ўринбосари Қ.А.Ҳакимов иштирок этди.
Изоҳ (0)