Жорий йилнинг 19—25 апрель кунлари Қуролли Кучлар академияси курсантлари жамоаси МДҲга аъзо давлатлар олий ҳарбий таълим муассасалари курсантлари ўртасида ўтказилган математика фани бўйича Халқаро олимпидада фахрли 3-ўринни қўлга киритди. Бу ҳақда Мудофаа вазирлиги матбуот хизмати «Дарё»га хабар берди.
Қозоғистоннинг Караганда давлат техника университетида бўлиб ўтган мазкур нуфузли фан олимпиадасида Ўзбекистон, Арманистон, Қозоғистон, Қирғизистон, Тожикистон, Беларусь ҳамда Россия Федерациясидан 7 та жамоа иштирок этиб, курсантларнинг олий математика борасидаги билимлари 3 та турда синовдан ўтди.
Якуний натижаларга кўра, 1-ўринни Россия Федерацияси, 2-ўринни Қозоғистон Республикаси ҳамда 3-ўринни ўзбекистонлик курсантлар эгаллади.
Таъкидлаш керакки, 2018 йилдан мазкур фан олимпиадасининг бир нечта йўналиши бўйича иштирок этиб келаётган Ўзбекистон Мудофаа вазирлиги курсантлари юқори натижаларни қайд этиб келяпти. Ўтган йили апрель ойида Олмаотада бўлиб ўтган мазкур олимпиаданинг математика йўналишида қатнашган Чирчиқ олий танк қўмондонлик-муҳандислик билим юрти курсантлари ҳам учинчи ўринни қайд этган эди. Қуролли Кучлар академияси курсантлари эса МДҲга аъзо мамлакатларнинг ҳарбий билим юртлари ўртасида ўтказиб келинаётган фан олимпиадасида 2019 йилдан иштирок эта бошлади.
Соврин билан Ўзбекистонга қайтиб келган курсантлар 26 апрель куни кечқурун Ислом Каримов номидаги Тошкент халқаро аэропортида Академия жамоаси, ота-оналар ва кенг жамоатчилик томонидан тантанали кутиб олинди.
Изоҳ (0)