Бойсун туманидаги Паданг қишлоғида Маданият вазирлиги, Сурхондарё вилояти ҳокимлиги ва бошқа ташкилотлар ҳамкорлигида 27 апрель куни бошланган «Бойсун баҳори» очиқ фолклор фестивали якунланди. Бу ҳақда ЎзА хабар берди.
Фестиваль доирасида халқ ансамбллари ва бадиий жамоалари ҳудудларига хос қадимий урф-одат ва анъаналари акс этган қизиқарли чиқишлари билан томошабинларни мамнун этди. Бахши-шоир, оқин ва жировлар беллашуви, кураш мусобақаси, варрак учириш, тош кўтариш, арқон тортиш каби халқ ўйинлари ташкил этилди. Миллий либослар, кўргазмаси, дорбозлар, театрлаштирилган томошалар, ёшларнинг шоу дастурлари уюштирилди.
Фестивалда биринчи ўринни Сурхондарё вилоятининг «Бойсун», Хоразм вилоятининг «Машъал» фолклор-этнографик жамоалари эгаллади.
Иккинчи ўрин Жиззах вилоятининг «Гаштак» ва Сирдарё вилоятининг «Сайхун йигитлари» жамоаларига насиб этди. Учинчи ўринни Тошкент вилоятининг «Тўрғай», Қорақалпоғистон Республикасининг «Афсона» ҳамда Навоий вилоятининг «Ёр-ёр» фолклор-этнографик жамоалари қўлга киритди.
Ғолиблар диплом ва эсдалик совғалар билан тақдирланди.
Изоҳ (0)