Шри-Ланкада бир қатор террорчилик ҳужумларидан сўнг, давлат раҳбари Майтрипала Сирисенанинг буйруғига биноан ҳар бир турар жой бинолари текширилади. Бу ҳақда 26 апрель, жума куни «ТАСС» ахборот агентлиги хабар қилди.
«Ҳар бир бино доимий аҳолисининг рўйхатга олиниши — бошқа номаълум шахслар учун яшаш имкониятига йўл қўймасликка боғлиқ сабаб», — дейди Сирисена.
Уч кун илгари, 23 апрель куни президент мамлакат хавфсизлигини таъминлаш учун масъул бўлган барча ташкилот раҳбарларини ишдан бўшатишга қарор қилди. Давлат раҳбари махсус хизматлар террористик ҳаракатларга тайёргарлик ҳақида маълумот олганини, аммо унга хабар бермаганлигини маълум қилди. Сирисена яқин орада полиция, хавфсизлик хизмати ва бошқа хавфсизлик органларини қайта ташкил этиш ниятида эканини айтди.
21 апрель куни Шри-Ланкада саккизта портлаш содир бўлди. Охирги маълумотларга кўра, 359 киши ҳалок бўлган, 500 дан ортиқ киши яраланган. Қурбонлар орасида қирқдан ортиқ чет эл фуқаролари, жумладан, Буюк Британия, АҚШ, Хитой ва Германия фуқаролари мавжуд. Улар орасида Россия фуқаролари йўқ. Шри-Ланканинг соғлиқни сақлаш хизмати раҳбари Анил Жасингенинг сўзларига кўра, расмий рақамлар нотўғри, қурбонлар сони ҳақиқатда, тахминан 260 киши.
Ҳужумлар учун масъулиятни ИШИД террористик гуруҳи ўз бўйнига олган. Шри-Ланка ҳукумати эса ҳужумлар маҳаллий экстремистик ташкилотлар томонидан амалга оширилганлигини таъкидламоқда. Тергов давомида жами 60 киши ҳибсга олинган, бир неча ўнлаб кишилар қидирилмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)