Шимолий Корея раҳбарининг акаси — Ким Чен Намнинг ўлдирилишида айбланган Вьетнам фуқароси 3 май куни озодликка чиқади. Бу ҳақда «ТАСС» хабар берди.
Бу хабарни 30 ёшли аёлнинг адвокати тасдиқлаган бўлиб, унинг сўзларига кўра, Доан Тхи Хуонг куннинг биринчи ярмида озод этилади ва кечга бориб ватанига учиб кетади.
Малайзия олий суди 1 апрель куни унга қўйилган айблов моддасини қасддан одам ўлдиришдан ўлимга олиб келган соғлиққа шикаст етказиш моддасига қайта ихтисослаштирган. Натижада у уч йил-у тўрт ой озодликдан маҳрум қилиш жазосига ҳукм қилинди. Адвокатнинг айтишича, аёлнинг қамоқда вақтинча ҳибсда сақланган вақти ҳам ҳисобга олинган.
Шу билан бирга, март ойида яна бир гумонланувчи 26 ёшли Индонезия фуқароси Сити Айша тўғри суд залидан озод қилинган. Давлат айбловчиси кутилмаганда ундан барча айбловларни бекор қилган ва қиз ўша куниёқ ватанига қайтган. Дастлаб прокурорлар аёллар қотилликка тайёргарлик кўрилишини олдиндан билган деб топган ва уларга ўлим жазосини сўраган.
Ким Чен Нам 2017 йилнинг 13 февраль куни Куала-Лумпур аэропортидан касалхонага олиб кетилаётганда вафот этган. Полиция маълумотларига кўра, у нотаниш одам юзига номаълум суюқлик сепиб, қочиб кетганини айтган ва кучли бош айланишидан шикоят қилган.
Малайзия ҳукумати ўлим асабни фалажловчи тақиқланган модда таъсир этиши оқибатида келиб чиққанини маълум қилган.
Деярли жиноят содир этилган пайтдаёқ қизлар билан бир қаторда КХДР фуқароси ҳам қўлга олинган. Кейинчалик далиллар йўқлиги сабабли у қўйиб юборилган ва ўша заҳотиёқ мамлакатдан депорт қилинган. Малайзия полицияси жиноят содир этилган куни яна тўрт нафар Шимолий Корея фуқароси Куала-Лумпурни тарк этган ва улар ҳозирда Пхеньянда деб ҳисобламоқда. Улар Интерпол линияси бўйича халқаро қидирувга берилган.
Изоҳ (0)