2019 йил 15 апрель куни Жиноят ишлари бўйича Бўз туман суди томонидан Ўзбекистон ЖКнинг 97-моддаси 1-қисми билан айбли деб топилган Олтинкўл тумани фуқароси Ш.А.З (эркак киши)га оид жиноят иши юзасидан ҳукм ўқилди. Бу ҳақда «Дарё»га Жиноят ишлари бўйича Бўз туман суди раиси Камолов Ҳ.Л. хабар берди.
Ш.А.З (эркак киши) 2018 йил 24-октябрдан 25 октябрга ўтар кечаси, соат 00:30 ларда акаси Ш.Б.З. қилаётган тўй олди маросимидан ўзининг яшаш уйига қайтиб келган. Турмуш ўртоғи Ш.З.А.га, опаси Д.Н.З. учун ётоқ жой солиб беришини айтганда Ш.З.А. ётоқ жой солиб бермаслигини, опасига хизмат қилишга тоқати йўқлигини айтиб жанжал кўтарган. Шу хусусида эр-хотин ўзаро жанжаллашиб қолган. Жанжал давомида хотини Ш.З.А. икки нафар фарзандлари Ҳ. (ўғил бола) ва Ҳ. (ўғил бола)нинг отаси бошқа шахс эканлигини айтган. Бундан жаҳли чиқиб кетган эр (Ш.А.З.) шу вақтда ётоқхонадаги жавонда турган уяли алоқа воситаларини қувватлантирувчи симни олиб, хотини Ш.З.А.нинг бўйин соҳасидан ўтказган ҳолда бўғиб, ерга йиқитган. Сўнг қўллари билан бўғиб, қасддан ўлдирган.
Суд-тиббий экспертизасининг хулосасига кўра, Ш.З.А.нинг танасида бўйин аъзоларининг сиқилиши натижасида юзага келган механик асфиксия, бўйин ўрта учлигидаги бир изли странгуляцион эгат жароҳати мавжудлиги аниқланган. Бўйин тери ости юмшоқ тўқимаси ва мушакларига қон қуюлишлари, бундан ташқари, қалқонсимон тоғай ва тил ости суяги атрофи юмшоқ тўқима ва мушакларига, кўз қовоғининг шиллиқ қаватларига ҳам қон қуюлиши кузатилган. Ички аъзоларининг тўлақонлиги ва тўқ қизил суюқ қон мавжудлиги, тан жароҳатларини олгани, ушбу оғир тан жароҳатларини олгани натижасида вафот этганлиги аниқланган.
Туман судининг 2019 йил 15 апрель кунги ҳукми билан фуқаро Ш.А.З. Ўзбекистон ЖКнинг 97-моддаси 1-қисми билан айбдор деб топилиб, унга 12 йил муддатга озодликдан маҳрум қилиш жазоси тайинланди.
Изоҳ (0)