Хивада шаҳар ҳокимлигининг ҳомийлиги остида Ички ишлар бўлимининг кўчма таянч пункти ташкил этилди. Бу ҳақда Хоразм вилояти ИИБ ходими подполковник З.Исмоилов хабар берди.
Хива шаҳрининг марказида жойлашган ушбу кўчма таянч пунктида Ички ишлар ходимларининг намунали хизмат олиб боришлари учун зарур шарт-шароитлар яратилган.
Таянч пунктида бевосита яқин ҳудудларга ўрнатилган кузатув камералари орқали теварак-атрофни доимий кузатиб бориш имконияти мавжуд. Шунингдек, таянч пунктида ходимларнинг узлуксиз хизмат олиб боришларини таъминлаш мақсадида дам олиш ва маиший-гигиена ҳамда ҳуқуқбузарлик содир этган шахсни сақлаш хоналари яратилган.
Замонавий қурилиш материаллари асосида яратилган мазкур таянч пункти пешлавҳасига ўрнатилган светодиот лампали тарғибот панноси билан маҳаллий аҳоли ва хорижий сайёҳларнинг диққатини ўзига тортади.
2019 йилнинг 23 апрель куни мазкур таянч пунктида ўтказилган кўргазмали семинарда Хоразм вилоятидаги барча шаҳар ва туманлар Ички ишлар бўлимлари бошлиқлари иштирок этди. Таянч пунктининг қулайлик ва афзалликлари ҳудудий ИИБ раҳбарлари томонидан юқори баҳоланди ва шу каби таянч пунктларини вилоятнинг барча шаҳар ва туманларида ташкил этишга қарор қилинди.
Шуни алоҳида қайд этиш керакки, зарурат туғилган пайтда мазкур таянч пунктини бир манзилдан иккинчисига ўтказиш имконияти ҳам мавжуд.
Изоҳ (0)