24 апрель, чоршанба куни Душанбе шаҳрида Марказий Осиё футбол ассоциациясининг навбатдаги конгресси бўлиб ўтди.
Конгрессда Тожикистон президентининг ўғли, Душанбе шаҳри ҳокими, шу билан бирга мамлакат футбол федерацияси президенти бўлган Рустам Эмомали CAFA’га (Марказий Осиё футбол ассоциацияси) янги президент этиб сайланди.
Қайд этиш жоиз, Рустам Эмомали Ўзбекистон футбол ассоциацияси вице-президенти Умид Аҳмаджонов ўрнида фаолият олиб боради.
Шунингдек, конгрессда Қирғизистон футбол федерацияси вице-президенти Дастанбек Конокбаев ташкилот биринчи вице-президенти этиб сайланди. Туркманистон футбол федерацияси бош котиби Арслан Айназаров ҳам ташкилотга вице-президент бўлди. Марказий Осиё футбол ассоциацияси штаб-квартираси ҳам эндиликда Тошкентда эмас, балки Душанбе шаҳрида жойлашади.
Маълумот учун, 2014 йил июнь ойида ташкил топган ташкилот олтита давлат футбол ассоциациясини бирлаштириб туради: Афғонистон, Эрон, Қирғизистон, Тожикистон, Туркманистон ва Ўзбекистон.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)