Шри-Ланкада католикларнинг Пасха куни содир бўлган портлашлар сабабли йигирма тўрт киши ҳибсга олингани ҳақида «Интерфакс» хабар берди.
Дамбулла шаҳридаги меҳмонхонада душанба куни икки киши ҳибсга олинган. Ҳибсга олиш 21 апрель куни содир бўлган портлашлар билан боғлиқ. Полиция ҳужумларга алоқадор 24 нафар гумондорларни қўлга олган.
Аввал 13 нафар ҳибсга олинганлар ҳақида хабар берилганди. Полиция, шунингдек ҳужумчиларни ўз машинасида олиб юрган ҳайдовчини ҳам ҳибсга олган.
Мудофаа вазири Руван Вижевардена аввалроқ портлашларни диний экстремистларнинг террористик ҳаракати деб атаган. Унинг сўзларига кўра, портлашларнинг аксарияти ҳудкушлар томонидан амалга оширилган.
Сўнгги маълумотларга кўра, портлашларда ҳалок бўлганларнинг сони 290 кишини ташкил этган, 500 киши жароҳат олган.
Шри-Ланкада якшанба куни тўққизта портлаш содир бўлган. Ҳужум объектлари пойтахт Коломбо ва унинг атрофидаги қиммат меҳмонхоналар, шунингдек Коломбо, Негомбо ва Баттикалоа шаҳарларидаги черковлар эди.
Изоҳ (0)