Бўстонлиқ туманидаги айрим йўлларда ҳафта давомида қатнов тўхтатилади

Ўзбекистонда велоспортнинг шоссе йўналиши бўйича Осиё чемпионати бошланди. Бу ҳақда ЎзА хабар бермоқда.

Қитъанинг 40 га яқин давлатидан 500 нафарга яқин велоспортчи иштирок этадиган мазкур мусобақани юқори савияда ўтказиш ва қатнашувчилар хавфсизлигини таъминлаш мақсадида Бўстонлиқ туманига олиб борувчи бир қатор автомобиль йўллари ҳафта давомида соат 07.00 дан 18.00 га қадар ёпилади.

Тошкент вилояти ИИБ ЙҲХБ матбуот хизматига кўра, 23—26 апрель кунлари соат 07.00 дан 18.00 га қадар 22 километрлик масофада велоспорт ўтказилиши муносабати билан 4R12 «Бектемир — Чирчиқ — Ғазалкент — Чорбоғ қўрғони» автомобиль йўлининг 32-километридан 62-километрларигача бўлган қисмида вақтинчалик автомобиль ҳаракати тўхтатилади.

27 апрель куни соат 07.00 дан 18.00 га қадар International Hotel Tashkent меҳмонхонасидан старт олган велопойгачилар хавфсизлигини таъминлаш мақсадида 4R12 «Бектемир — Чирчиқ — Ғазалкент — Чорбоғ қўрғони» автомобиль йўли тўлиқ ва 4R10 «Чорбоғ сув омбори ҳалқа йўли» нинг 61 километргача (Сижжак қишлоғигача) бўлган автомобиль йўлида вақтинчалик автомобиль ҳаракати тўхтатилади.

28 апрель куни 4R12 «Бектемир — Чирчиқ — Ғазалкент —Чорбоғ қўрғони» автомобиль йўлининг 62 километргача бўлган қисмида ва 4R6 «Тошкент—Чирчиқ—Чимён» автомобиль йўлининг 54 километридан 76 километригача (Билдирсой дам олиш масканигача) бўлган масофадаги қисмида вақтинчалик автомобиль ҳаракати тўхтатилади.

Шу муносабат билан Бўстонлиқ туманига дам олиш мақсадида борувчи ҳайдовчиларга 4R6 «Тошкент — Чирчиқ — Чимён» автомобиль йўли (Чирчиқ шаҳри орқали) орқали ҳаракатланиш тавсия этилади.