Соғлиқни сақлаш вазирлиги Жамбил вилоятида ҳалокатга учраганларнинг соғлиғини алоҳида назоратга олингани ҳақида вазирлик матбуот хизмати «Дарё»га хабар берди.
Жорий йилнинг 20 апрель куни тонгги соат 05:09 да Қозоғистоннинг Жамбил вилояти Кордай туманидаги «Чимкент—Олмаота» трассасининг 181 километрида автобус иштирокида йўл- транспорт ҳодисаси рўй берган эди.
49 нафар йўловчиси бўлган автобусда 11 нафар киши йўл-транспорт ҳодисаси оқибатида ҳалок бўлган. Бахтсиз ҳодиса оқибатида вафот этганларнинг уч нафари ўзбекистонликлар бўлиб, 13 нафари турли даражада жароҳатланган.
Ўзбекистон Президенти Шавкат Мирзиёевнинг жабрланганларга зудлик билан тиббий ёрдам кўрсатиш ва Ўзбекистонга олиб келиш бўйича берган топшириғига кўра, хукумат комиссияситузилиб, махсус самолёт ажратилди. Йўл-транспорт ҳодисаси оқибатида жароҳатланган ўзбекистонликларга ушбу бортда Ватанига олиб келинди. Авиаборт билан Соғлиқни сақлаш вазирлигининг масъул ходимлари, Республика шошилинч тиббий ёрдам илмий маркази директори Козим Маҳкамов бошчилигидаги шифокорлар гуруҳи ҳам етиб борган.
—Биз махсус авиаборт билан етиб борганимизда қозоғистонлик шифокорлар томонидан жароҳатланган ҳамюртларимизга тезкор биринчи тиббий ёрдам кўрсатилган эди, — дейди Козим Маҳкамов. — Шифокорлар гуруҳи Фавқулодда вазиятлар вазирлиги ходимлари билан жароҳатланганларни авиабортга чиқаргач, бортнинг ўзида улар саломатлиги қайта текширувдан ўтказилди. Керакли муолажалар зудлик билан амалга оширилди. Ўзбекистонда бизни махсус жиҳозланган «Тез тиббий ёрдам» автомашиналари кутиб олди ва беморлар зудлик билан Республика шошилинч тиббий ёрдам илмий марказига етказилди.
Жароҳатланганлар орасида қорақалпоғистонлик 34 ёшли Омирбек Ҳайтбаевнинг жароҳати анча оғир эди. Агар унга ўз вақтида малакали тиббий ёрдам кўрсатилмаса, ҳаёти хавф остида қолаётган эди. Шифокорларнинг шошилинч равишда уринишлари натижасида Омирбек Ҳайтбаевда мураккаб жарроҳлик операцияси муваффақиятли ўтказилди. Ҳозир бемор ўзини яхши ҳис қилмоқда.
Ҳозирда Ўзбекистонга келтирилган фуқароларга Республика шошилинч тиббий ёрдам илмий марказида малакали тиббий-жарроҳлик муолажалари кўрсатилмоқда. 20 апрель соат 12:00 гача уларнинг икки нафарига мураккаб жарроҳлик амалиётлари муваффақиятли ўтказилган бўлса, айни пайтда яна уч нафар бемор операция столига олинган.
Республика шошилинч тиббий ёрдам илмий марказида ҳалокат оқибатида жабрланганларга юқори малакали тезкор ва сифатли тиббий ёрдам кўрсатиш учун барча шарт-шароитлар яратилган. Қўшимча дори-дармон ва тиббий воситалар етказиб берилган.
Изоҳ (0)