Мажбурий ижро бюросининг Андижон туман бўлими давлат инспектори М.Шодмонов 30 январь куни соат тахминан 16:30 да ўзига бириктирилган «Бешбўйноқ» маҳалласида яшовчи фуқаро Л.Тошалиевнинг хонадонига бориб, электр энергиясидан фойдаланишнинг қонунийлигини текшириш мақсадида уйдагиларни чақирганида, Тошалиевнинг қариндоши М.Тўйчибоева чиқиб, уйда ҳеч ким йўқлигини айтган.
Давлат инспектори Тўйчибоеванинг иштирокида текширув ўтказган вақтда, хонадонга ўрнатилган ҳисоблагич электрон дастурга киритилмаганлиги маълум бўлади. Ҳолат юзасидан давлат инспектори далолатнома расмийлаштириб, хонадонни электр тармоғидан узиб қўяди. Шундан сўнг фуқаро Тошалиев уйдан чиқиб келиб, давлат инспекторидан уйни электр тармоғига улаб қўйишини талаб қилади.
Давлат инспектори тармоққа қайта уланиш тартибини тушунтираётганида Л.Тошалиевнинг укаси С.Азимов хонадонидан болта олиб чиқиб, давлат инспекторига куч ишлатмоқчи бўлади. Шунда фуқаро Тошалиев укаси Азимовдан қўлидаги болтани олиб қўйиб, гўёки давлат инспекторига куч ишлатмасликни айтиб, давлат инспекторидан хизмат гувоҳномасини кўрсатишини сўрайди.
Давлат инспектори М.Шодмонов хизмат гувоҳномасини кўрсатиш учун олаётган вақтда Тошалиев давлат инспекторининг юзига мушт туширади. Натижада Шодмонов йиқилиб тушади ва ака-ука Тошалиев ва Азимов давлат инпекторига нисбатан куч ишлатиб, уятли сўзлар билан ҳақорат қилиб, тан жароҳати етказади.
Мажбурий ижро бюроси матбуот хизматидан «Дарё»га маълум қилишларича, 12 апрель куни жиноят ишлари бўйича Андижон туман суди ушбу ҳолат бўйича ишни кўриб чиқиб, Жиноят кодекси 105-моддасининг 1-қисмига асосан, Л.Тошалиевга нисбатан 3 йил озодликдан чеклаш жазосини тайинлади.
Изоҳ (0)