Франциядаги Ибн Сино ҳайкали, россиялик блогердан Bentley ютиб олган ўзбекистонлик, МИБ ходимига мотоарра билан ҳужум қилиб, қамалган фуқаро ва куннинг бошқа хабарлари

19 апрелнинг эътиборга молик янгиликлари — «Дарё» дайжестида.

Францияда ўзбек боғи очилди ва Ибн Сино ҳайкали ўрнатилди.

Франциянинг Рюэй-Мальмезон ва Бухоро шаҳарлари биродарлашганига 20 йилдан ошди.

Ушбу дўстлик алоқалари доирасида жорий йил 17 апрель куни Рюэй-Мальмезон шаҳридаги «Дўстлик» паркида ўзбек боғи ҳамда Абу Али ибн Сино шарафига ёдгорлик ҳайкалининг очилиш маросими бўлиб ўтди.

***

Ўзбекистонлик йигит россиялик блогердан Bentley машинасини ютиб олди.

Маълум бўлишича, россиялик блогер Михаил Литвин ўзининг Bentley машинасини ноодатий тарзда ўйнашга қарор қилган. Унинг беллашув шартига кўра, ким кўпроқ машинадан қўл узмай турса, ўша одам ғолиб деб топилган.

***

Жиззахда МИБ ходимига мотоарра билан таҳдид қилган шахс озодликдан маҳрум қилинди.

Жиззах вилояти Шароф Рашидов туманидан бўлган В.Мирзаев Мажбурий ижро бюроси туман бўлими давлат ижрочиларига фаол қаршилик кўрсатиши оқибатида бугун панжара ортида ўтирибди.

***

Юнусободдаги «Асака банк» филиалига сўмга алмаштириш учун тақдим этилган 29 минг евро қалбаки бўлиб чиқди.

Текширув давомида фуқаро А.З. томонидан «Асака банк» Юнусобод филиалига миллий валютага айирбошлаш учун тақдим этилган 58 дона 500 евро купюралик, жами 29 минг евро қалбаки эканлиги аниқланган.

***

Корея республикаси президенти Мун Чжэ Иннинг Ўзбекистонга ташрифи давом этмоқда.

Кўксарой қароргоҳида Мун Чжэ Инни расмий кутиб олиш маросими бўлиб ўтди.

Ўзбекистон ва Корея Республикаси музокаралари якунлари бўйича ҳужжатлар имзолаш маросими бўлиб ўтди.

Ўзбекистон Республикаси билан Корея Республикаси муносабатлари алоҳида стратегик шериклик мақомига кўтарилди.

Шавкат Мирзиёев ва Мун Чжэ Ин Ўзбекистон – Жанубий Корея бизнес-форумининг очилиш маросимида иштирок этди.

Ўзбекистон ва Жанубий Корея президентлари рафиқалари билан бирга икки мамлакат санъат усталарининг концерт дастурида иштирок этди.