1 майдан чиқариладиган Humo карталари, Ўзбекистоннинг камайган валюта захиралари, Перу собиқ президентининг ўлими ва куннинг бошқа хабарлари

17 апрелнинг эътиборга молик янгиликлари — «Дарё» дайжестида.

Ўзбекистонда Humo карталарини чиқариш жорий йил 1 майдан бошланади.

Ҳозирда синов тартибида Марказий банк ва тижорат банклари ходимлари учун бир нечта карта чиқарилди.

Улардан апрель ойи охири, май ойи бошларидан бошлаб фойдаланиш мумкин бўлади.

***

Ўзбекистон валюта захиралари йил бошидан буён илк бор камайди.

Ўтган ойда мамлакатнинг олтин захиралари 400 миллион долларга камайган.

1 апрель куни мамлакатнинг валюта заҳиралари 26,9 миллиард долларни ташкил этган. Уларнинг 14,4 миллиард доллари монетар олтиндир.

***

Перунинг собиқ президенти вафот этди.

У коррупцияда айблангани учун полиция уни ҳибсга олмоқчи бўлган. Аммо собиқ президент айбини тан олмаган.

Алан Гарсиянинг уйига полиция борганида у ўз жонига қасд қилишга уриниб, комага тушиб қолган эди.

***

Давлат бошқаруви академияси ходимлари ҳам Тошкентда доимий прописка қилиниши мумкин бўлди.

Ҳукумат қарори (317-сон, 16.04.2019 й.) билан Президент ҳузуридаги Давлат бошқаруви академияси раҳбарлари ходимларни Тошкент шаҳри ва Тошкент вилоятида доимий прописка қилиш тўғрисида илтимоснома киритиши мумкин бўлган давлат органлари ва бошқа давлат ташкилотлари рўйхатига киритилди.

***

Ўзбекистонда 2023 йилдан бошлаб электр энергияси учун нархлар камида 3 йил ўзгармайди.

Ҳукумат қарори билан 2030 йилгача бўлган даврда Ўзбекистон Республикаси электр энергия тармоғидаги тариф сиёсатининг асосий йўналишлари тасдиқланди.

2023 йилгача тарифларни шакллантириш методикасига босқичма-босқич ўтилади. 2023 йилдан бошлаб электр энергияси учун тарифлар камида 3 йил муддатга амал қилади.