Ўзбекистондаги биринчи атом электр станцияси қаерга қурилиши бир ой ичида аниқ бўлади. Бу ҳақда «Ўзатом» агентлиги директори Жўрабек Мирзамаҳмудов Сочида бўлиб ўтаётган XI «Атомэкспо» форумида маълум қилди, деб хабар берди «Дарё» мухбири Севара Нишонова.
Унинг маълум қилишича, МАГАТЭ (Халқаро атом энергетикаси агентлиги) тавсиясига кўра, 2018 йилнинг октябрь ойидан бошлаб Ўзбекистонда биринчи АЭС қурилиши учун муносиб майдон танлаш бўйича муҳандислик қидирув ишлари ошириб келинмоқда.
«Майдонларни ўрганиш бўйича барча ишлар якунланди. Ҳисобот тайёрланди. Ҳозирда ушбу ҳисобот бизнинг ‘Росатом’даги ҳамкорларимиз томонидан ўрганилмоқда. Ўрганишлар асосида майдон танланади ҳамда АЭСнинг техник лойиҳаси бўйича муҳандислик қидирув ишлари бошланади.
Ушбу маълумотлар асосида АЭС қуриладиган майдоннинг атроф-муҳитга таъсири баҳоланади, баҳолаш жараёни эса ўрнатилган тартибда экспертиза ва оммавий эшитувлардан ўтказилиши керак», — дейди Мирзамаҳмудов.
«Ўзатом» агентлиги директори шунингдек, Ўзбекистон нима учун атом электр станцияси қуришга қарор қилгани ҳақида ҳам сўзлаб берди:
«Биз нима сабабдан атом дастурини бошлашга қарор қилганимиз ҳақида бир неча оддий фикр айтаман. Бу қарор қандайдир ‘мода’ ортидан қувиб қабул қилинмади. Бу— чин маънода иқтисодий қарор.
Бизда табиий газ кўп ва биз уни қайта тикланувчи энергия манбалари олиш учун ишлатишни режалаштирмоқдамиз. Гидро, шамол ва қуёш электр станциялари ишламоқда. Бироқ аҳоли сони йилдан йилга ортиб бормоқда ва бизнинг баҳолашларимизга кўра бу чоралар келгусида талабни қондириш учун етарли бўлмайди. Шунинг учун ҳам келгусидаги электр энергиясига бўлган талабни қондириш чораларидан бири сифатида атом элекрт станциясини қуришга қарор қилдик.
Яна бир муҳим сабаблардан бири газ, нефть ва бошқа ресурслар мавжудлигига қарамай , кун келиб камайиши мумкин. Янги авлод атом электр станциялари эса юз йил ишлашга қодир. Бу узоқ муддатли келажакни режалаштириш, илм-фан, меҳнат ресурслари ва бошқа соҳалар ривожланиши учун туртки
Ҳозирда биз атом энергетикаси — хавфсиз, ишончи, экологик ва сарф нуқтайи назаридан самарали энергия манбаси эканлигига амин бўлмоқдамиз», — дейди Жўрабек Мирзамаҳмудов.
Изоҳ (0)