Қорақалпоғистоннинг Мўйноқ туманида қорақалпоқ мумтоз шоири Ажиниёз Қўсибой ўғли хотирасига боғ барпо қилинди. Ушбу боғнинг яратилишига Ажиниёз номидаги Нукус давлат педагогик институти профессори Kenesбай Алламбергенов бошчилик қилмоқда, деб хабар берди ЎзА.
«Ҳар йили институтимизда Ажиниёз кунлари бўлиб ўтади. Жорий йилда ҳам мумтоз шоиримизнинг кунларига бағишланган қатор тадбирлар режалаштирилган. Ҳар йилгидан фарқлироқ, бу йилда биз Мўйноқ туманида ‘Ажиниёз боғиъни барпо қилишга қарор қилдик, – дейди профессор Kenesбай Алламбергенов.
Боғ Мўйноқ тумани «Бозатау» овул фуқаролар йиғини ҳудудидаги Шағирли овулида 0,5 гектар ер майдонида яратилди. У ерга 400 дан ортиқ янгидан ҳар хил мева-сабзавот кўчатлари экилди.
Ушбу қишлоқда ўтган йили Ўзбекистон давлат санъат ва маданият институти ва ушбу институтнинг Нукус ҳамда Фарғона минтақавий филиаллари томонидан «Қўқон боғи» яратилган бўлса, жорий йилда Ўзбекистон Миллий университетининг ўқув-илмий полигони, яъни талабалар боғи ҳам яратилди. Шунингдек, Қорақалпоқ давлат университети ва Нукус давлат педагогика институти ҳам ушбу хайрли ишга ўз ҳиссасини қўшган эди. Ҳозирда экилган кўчатларнинг 80 фоизи кўкариб, куртакларини ёзган.
«Биз сўнгги йилларда, хусусан, шу йили январь ойидан бошлаб Президентимиз Ш.Мирзиёев раҳбарлигида Мўйноқ туманини ободонлаштириш ва унинг халқини ижтимоий мухофаза қилиш бўйича олиб борилаётган ишлардан беҳад миннатдормиз. Президентимизнинг ташаббуси билан Оролнинг қуриб қолган майдонига саксовул уруғлари экилиб, у ерларнинг яшил қопламалар зонасига, кўкаламзорликка айлантирилиши бўйича олиб борилаётган ишлар халқимизнинг руҳини кўтариб юборди. Мана, баҳор келиши билан қишнинг қаҳратон совуқларида қилган меҳнатлари зоя кетмай, сепилган саксовул уруғлари «кўз ёриб», игнадай ердан санчилиб чиқмоқда», – дейди «Бозатау» ОФЙ раиси Жумабай Нуримбетов.
Янгидан барпо қилинган «Ажиниёз боғи»ни Нукус давлат педагогика институтининг Қорақалпоқ адабиёти кафедраси ва ушбу кафедра қошида ташкил қилинган «Зиюар» (шоирнинг таҳаллуси) адабий тўгарагига аъзо талабалар ўз ғамхўрлигига олган.
«Ажиниёз кунлари» доирасида мазкур институтнинг бир гуруҳ профессор-ўқитувчилари ва талабалари, кенг жамоатчилик вакиллари Мўйноқ тумани ҳудудида жойлашган буюк шоирнинг қабристони ва мақбарасига зиёрат қилди.
Эслатиб ўтамиз, жорий йилда қорақалпоқ халқининг буюк шоири Ажиниёз Қўсибой ўғлининг 195 йиллиги нишонланади. Нукус давлат педагогика институтида 7—13 апрель кунларида ўтказилаётган мазкур тадбир доирасида илмий-амалий анжуман ўтказилиши, «Зиюар» номли ҳужжатли фильмнинг премераси бўлиб ўтиши режалаштирилган.
Изоҳ (0)