Toshkent shahrining Sergeli tumanida joylashgan arzon ko‘p qavatli uylardagi xonadonlar aholisining ular yashayotgan uy-joylar narxining oshishi yuzasidan noroziligiga sabab bo‘lgan holat bo‘yicha Oliy Majlis deputati Rasul Kusherbayev munosabatini bildirdi.

Foto: Google Images

O‘tgan yilning yozida Sergelida qurilayotgan uy-joylarning narxi keskin oshib ketganligi yuzasidan dastlab Toshkent shahar hokimi va ‘O‘zshaharqurilishinvest’ IK, keyinchalik Qurilish vazirligi, ‘O‘zqurilishmateriallari’ AK va boshqa mas’ul idoralarga deputatlik so‘rovi bilan chiqib, ularni ushbu masalaga ochiq ko‘z bilan, bir oyda 1 yoki 1,5 million daromad qiladigan uyga muhtoj oilaning qarichi bilan qarab, xulosa chiqarishlarini so‘rovdim.

Afsus shahar hokimi jamoasi o‘shandayoq bu masalaga ko‘z yumib qo‘ya qoldi: bir oy urinib, axiyri sarson so‘rovni ‘O‘zshaharqurilishinvest’ IKga yo‘naltirishgan xolos.

Qolganlari ham uzoq tushuntirishib, oddiy aytganda ‘aravani rosa sudrash’dan nariga o‘tishmadi. Biroq 2019-yilda narx oshmaydi, maxsus loyiha ishlab chiqdik, degan va’dalar bor edi... qani?

Xullas o‘sha vaqtda qo‘yilgan savolimga hozirgacha javob ola olmayapman: baraka topgur quruvchi, direktor, rais, hokim va ko‘plab mas’ullar yana so‘rayapman: Sizlarning uyga muhtojlar uchun ‘arzon uy-joy’, degan uylaringiz respublika bo‘ylab qurilayotgan ayrim tijorat uylaridan ham qimmatga aylanib ketayaptiku! Kamiga sifatsiz degan gaplar yuribdi. Buni qanday izohlaysizlar? Bu uylarni arzon deyish mumkinmi?

Gaplarimga ishonmasangiz olx.uz saytiga kirib ko‘ring.

Ota-bobolarimiz amal qilib kelgan ‘lafz’ degan gap bor axir, boshda kelishildimi bo‘ldi: oxirigacha lafzdan qaytmaslik kerak. Bizga shuni o‘rgatishmaganmi ajdodlarimiz: lafzsizning oxiri voy va sharmandalik.

Rasul Kusherbayev, Oliy Majlis deputati 

Bundan avval, Sergeli tumanida joylashgan arzon ko‘p qavatli uylardagi xonadonlar aholisining ular yashayotgan uy-joylar narxining oshishi yuzasidan noroziligiga sabab bo‘lgan holat O‘zbekiston Respublikasi Oliy Majlisining Inson huquqlari bo‘yicha vakili (Ombudsman) tomonidan nazoratga olingani haqida xabar bergan edik.