Д.М. исмли шахс қалбаки квитанциялар тайёрлаб, аҳолидан жами 15,292,176 сўм пулни ноқонуний ундирган. Бу ҳақда ЎзА хабар берди.
Носоз газ ускуналари орқали газдан фойдаланиш инсон ҳаёти ва соғлигига жиддий хавф туғдиради. Бунинг олдини олиш учун аҳолини газ билан таъминлашга мутасадди идора ходимлари ҳар йили газ ускуналарини мажбурий кўрикдан ўтказади. Ушбу хизмат учун аҳолидан белгиланган миқдорда тўлов ундирилади.
Бироқ, аҳолини газ билан таъминлашга мутасадди идорада ишловчи айрим нопок ходимлар аҳолини газ билан таъминлаш жараёнида хизмат кўрсатишда уларнинг ҳаёти ва соғлиғи хавфсизлигини эмас, балки ўз нафсларини ўйлаб иш тутаётганликлари аниқланди.
Жиноят иши тафсилотларига кўра, Д.М. 14.09.2017 йилдан 13.07.2018 кунига қадар «Ўзтрансгаз» акциядорлик жамиятининг Фарғона вилояти бўйича газ таъминоти ҳудудий филиали Тошлоқ туманлараро участкасидаги аҳолини суюлтирилган газ билан таъминлаш участкасида газ ускуналарини таъминлаш ва экспулатация қилиш бўйича чилангар вазифасида ишлаб келган. Ўзи ишлаган даврда қалбаки квитанциялар тайёрлаган, улардан фойдаланиб Тошлоқ тумани ҳудудида яшовчи 744 нафар фуқарога тақдим қилган. Бунинг учун фуқаролардан гўёки жорий кўрик учун 20,554 сўмдан, жами 15,292,176 сўм пулни олиб, уларни ҳисоботда кўрсатмасдан ва туманлараро газ участкасига тошпирмасдан ўзлаштириш йўли билан талон-торож қилган.
Изоҳ (0)