Фарғона, Андижон ва Наманган вилоятлари ҳудудида Ўзбекистон мудофаа вазирининг биринчи ўринбосари — Қуролли Кучлар бош штаби бошлиғи генерал-майор Павел Эргашев раҳбарлигида барча куч тузилмаларининг ҳамкорликдаги ҳаракатларини мувофиқлаштириш бўйича ҳамкорликдаги қўмондонлик-штаб ўқувлари ўтказилмоқда. Бу ҳақда «Дарё»га Мудофаа вазирлиги матбуот хизмати маълум қилди.
Ўқувларга Мудофаа, Ички ишлар, Фавқулодда вазиятлар вазирликлари, Давлат хавфсизлик хизмати Чегара қўшинлари ва бошқа бўлинмалари, Миллий гвардия, Давлат божхона қўмитаси куч ва воситалари, шунингдек, маҳаллий ҳокимликлар ҳамда ўзини-ўзи бошқариш органлари жалб қилинди.
Машғулотлар қўшинлар ва бошқарув органларини юқори жанговар шайликка келтириш билан бошланди. Ҳозирда бўлинмалар жанговар ўқув вазифаларни бажариш ҳудудига олиб чиқилган.
Ўқувлар Шарқий ҳарбий округнинг барча полигонларида бўлиб ўтмоқда. Уларда куч тузилмаларининг тегишли бўлинмалари замонавий хавф-хатарларга қарши қаратилган ҳамкорликдаги тадбирларни амалий бажариш масалалари кўриб чиқилмоқда.
Изоҳ (0)