Навоий вилоятида Matiz машинасида одам уриб юбориб, воқеа жойидан қочиб кетган ҳайдовчи қўлга олинди. Бу ҳақда вилоят ИИБ матбуот хизмати «Дарё»га хабар берди.
2 апрель куни соат 01:30 ларда У.А. Matiz русумли автомашинани М-37 автомобиль йўлининг 151–152 километрлари оралиғида «Самарқанд–Бухоро » йўналиши бўйлаб бошқариб бораётиб 1997 йилда туғилган Ш.Ш.ни машинанинг ўнг олд томони билан уриб юборган. Ҳайдовчи пиёданинг соғлиғи учун хавфли бўлган оғир тан жароҳати олганлигини била туриб унга биринчи тиббий ёрдам кўрсатмасдан воқеа жойидан қочиб яширинган. Оқибатда Ш.Ш. олган тан жароҳатлари оғирлиги сабабли воқеа жойида вафот этган.
Ш.Ш.нинг танаси бир неча соат давомида йўл четида қолиб кетган. Тонг ёришаётган маҳалда ички ишлар органларига йўл четида мурда ётганлиги ҳақида хабар келиб тушган. Эксперт-криминалистика бўлими ходимлари ҳодиса жойини кўздан кечирган. Улар ЙТҲ юз берган ердан топилган бўлаклар орқали Ш.Ш.ни Matiz русумли машина уриб юборганини аниқлаган.
Кузатув камералари орқали ҳодиса рўй берган вақтда ушбу йўлдан ўтган машиналар кузатилган ва ЙТҲ содир этгани тахмин қилинаётган Matiz автомобили аниқланган. Навоий шаҳри бўйлаб қидирув эълон қилинган, бир соат ичида машина ва ҳайдовчи топилган.
Гумонланувчи У.А. машина ўзига тегишли эмаслигини, уни ҳужжатларсиз бошқарганлигини, бундан ташқари тунда кимни ёки нимани уриб юборганини билмаслигини, чунки ўша вақтда маст бўлганини маълум қилган.
У.А.га нисбатан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши) ва 117-модданинг 2-қисми (Хавф остида қолдириш одам ўлишига сабаб бўлиши) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)