Ўзбекистон Президенти Шавкат Мирзиёев Бухоро вилоятига ташрифи доирасида Когон туманидаги «Тараққиёт» маҳалла фуқаролар йиғини марказида бўлди. Бу ҳақда Президент матбуот хизмати хабар бермоқда.
Йиғин биноси янги лойиҳа асосида барпо этилган бўлиб, унда фуқароларнинг ўзини-ўзи бошқариш органлари фаолиятини мувофиқлаштириш бўйича Когон тумани кенгаши фаолият юритмоқда.
Бу ерда жорий этилган Аёллар ижтимоий мослашув маркази оғир аҳволга тушиб қолган хотин-қизлар ва болаларга маънавий-психологик, тиббий ва ҳуқуқий кўмак кўрсатиш билан шуғулланади.
Кенг ва шинам хонада жойлашган, Алишер Навоий номидаги Ўзбекистон Миллий кутубхонаси электрон базасига уланган замонавий кутубхона аҳоли, айниқса ёшлар учун маърифат масканидир.
Марказ яқинида жойлашган иккита сунъий қопламали майдон ҳамда тренажёрлар зали маҳалла болалари ва ўсмирларининг бўш вақтини мазмунли ўтказишига хизмат қилади.
Шунингдек, фуқаролар йиғинида яқинда Ўзбекистонда энг намунали деб топилган ҳамда Nexia 3 автомобили билан тақдирланган замонавий ички ишлар таянч пункти ҳам фаолият юритмоқда.
Маҳалла маркази ҳудудида барпо этилган кундузги стационар ва тантаналар зали ҳам аҳоли хизматида. Шавкат Мирзиёев маҳалла маркази ходимлари, шу ердаги интеллектуал клуб аъзолари бўлган ёшлар билан мулоқот қилди.
Президент матбуот хизматининг қўшимча қилишича, маҳалла марказига ташрифдан сўнг, Шавкат Мирзиёев Бухоро вилоятига сафарини якунлаб, Тошкентга қайтиб келган.
Изоҳ (0)