2019 йилнинг ўтган даври мобайнида Қашқадарёда инсон ўлими билан якунланган 29 та йўл-транспорт ҳодисаси содир этилган бўлиб, оқибатда 30 киши бевақт ҳаётдан кўз юмган. Бу ҳақда Қашқадарё вилояти Йўл ҳаракати хавфсизлиги бошқармаси бошлиғининг Яккабоғ туманидаги «Жийда» қишлоғи аҳолиси билан бўлган мулоқотида иштирок этган «Дарё» мухбири маълум қилмоқда.
ЙТҲларнинг 3 таси Яккабоғ тумани ҳудудида рўй берган бўлиб, натижада 4 нафар фуқаро вафот этган.
Вилоят ЙҲХБ бошлиғи ва аҳоли ўртасидаги мулоқотда маълум қилинишича, жорий йилнинг 24 март куни соат 01:40 да «Жийда» қишлоғи ҳудудида 1996 йилда туғилган «Калта» қишлоғида яшовчи Тошкент ахборот технологиялари университети талабаси Р.I. бошқарувчидаги Nexia аввал ўзига қарама-қарши томондан келаётган Nexia’га, сўнгра йўл четида турган Damas’га урилиб, йўлни кесиб ўтаётган 2 нафар фуқарони уриб юборган. Натижада 1985 йилда туғилган I.Ш. ҳамда Т.А.лар воқеа жойида вафот этган. Вилоят ИИБ матбуот хизмати маълумотига кўра, мазкур ҳолат юзасидан ҳайдовчи Р.I.га нисбатан Жиноят кодексининг 266-моддаси 3-қисми «а» банди (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши қўзғатилиб, тергов-суриштирув жараёнлари бошлаб юборилган.
— Жийда қишлоғида содир этилган ЙТҲ туманда инсон ўлими билан якунланган 3-йўл-транспорт ҳодисаси ҳисобланади, — дейди Қашқадарё вилоят Йўл ҳаракати хавфсизлиги бошқармаси бошлиғи Эркин Қурбонов. – Энг ачинарлиси ушбу ҳодиса оқибатида 2 та хонадон яқин кишиларидан айрилди. Эндигина 23 ёшни қаршилаган ҳайдовчи йигит эса энди умрининг энг гуллаган чоғини қамоқда ўтказишга маҳкум. Шунинг учун ҳам ота-онларимиздан, жамоатчиликдан огоҳликни талаб қилаяпмиз. Биргина биз эмас, барчамиз йўлдаги кўнгилсиз ҳолатларнинг олдини олишга масъулмиз. Боиси, ҳар қандай кўнгилсиз ҳолат сиз ва бизнинг ҳаётимизга хавф солиши мумкин.
Йиғилишда сўз олган қишлоқ аҳолиси ҳудуд профилактика инспекторини ҳатто танимаслиги ва ходим иш фаолиятидан норози эканлигини билдирди. Аҳоли эътирозига жавобан ҳолатни тумандаги мавжуд 59 та маҳаллада 47 нафар профилактика инспектори фаолият юритишини ва битта инспектор баъзан 2 та маҳаллага жавобгар ҳисобланиши билан изоҳлаган ИИБ бошлиғи Шерзод Шокировнинг гапини бўлган туман ҳокими Шомурод Донаев ходим ўз ишига масъулият билан ёндашмаганлигини билдириб, туман ИИБ бошлиғига ходим билан кўпроқ ишлаш лозимлигини айтди.
Давра суҳбати сўнгида туман йўл инспекторлари «рейд»ида маст ҳолатда автомобиль бошқарганлиги аниқланган 4 нафар фуқаро устидан сайёр суд мажлиси ҳам бўлиб ўтди. Сайёр суд якунига кўра, 2 нафар айбланувчига 15 суткалик қамоқ жазоси тайинланган бўлса, 1 нафар фуқарога энг кам иш ҳақининг 25 баравари миқдорида жарима жазоси қўлланилди. 1 нафар фуқаро суди эса кейин кўриб чиқиш учун қолдирилди.
Изоҳ (0)