Асака туманининг Ниёзботир маҳалласида вилоят ички ишлар бошқармаси бошлиғи ҳамда Ўзбекистон Президентининг Андижон вилоятидаги Халқ қабулхонаси мудири фуқароларнинг мурожаатлари бўйича сайёр қабул ўтказди. Бу ҳақда вилоят ИИБ матбуот хизмати «Дарё»га хабар берди.
300 га яқин фуқаро иштирок этган қабул давомида йўлларни шағаллаш, электр таянчлари ўрнатиш ва эскирган трансформаторларни алмаштириш, ичимлик ва оқава суви, имтиёзли кредитлар, суюлтирилган газ балонлари ажратилиши, ҳудудда мактабгача таълим муассасасини қуриш, фуқароларнинг саломатлигини тиклаш ва ногиронлик аравачалари билан таъминлаш, тадбиркорлик фаолиятини бошлаш учун ер ажратиш бўйича100 дан ортиқ мурожаат қабул қилинган.
— Маҳалладошларимнинг илтимоси билан уларнинг номидан 2 та кўчани шағаллаштириш масаласи бўйича мурожаат қилдим, — дейди Гумбаз маҳалласида яшовчи фуқаро Мунисахон Жабборова. – Шунингдек, салкам икки километрлик кўчамизнинг ярмига шағал ётқизилган, қолган қисмига ҳам тўкиб бериш имкони бўлса, яхши бўларди. Қиш қировли кунларда бизку бир амаллармиз, лекин болаларимиз ўқишга бориши учун лой кечиб ўтиши керак.
«Фидокор»лик Абдухалим ота Мамадалиев ҳам ҳудди шу масала бўйича мурожаат қилди. Унинг атишича, ўзи истиқомат қилаётган кўчанинг 2 км қисмига ҳатто шағал ҳам ётқизилмаган.
— Бир неча йиллардан бери касаллигим боис чуқурлаштирилган тиббий кўрикдан ўтиш учун ёрдам сўраб келдим , — дейди Қурама маҳалласида истиқомат қилувчи Раҳмонов Шаробиддин. – Бугунги сайёр учрашувда Тошкентга бориб бепул даволаниб келишим учун йўлланма беришларини айтишди. Бундан жуда хурсандман.
— Уйда бекор ўтирмайин, деб товуқ боқа бошладим, - дейди Ариқбўйи маҳалласидан ташриф буюрган Муҳаббатхон Халилова. – Бугунги кунга келиб уларнинг сони 3 мингтага етди. Келгусида фаолиятимни кенгайтириш ниятидаман. Бунинг учун менга банк томонидан 30 миллион сўм маблағ зарур. Мурожаати бўйича менга «Ҳар бир оила тадбиркор» давлат дастури доирасида кредит ажратиладиган бўлди.
Сайёр қабул давомида 50 дан ортиқ мурожаатлар жойида ўз ечимини топган бўлса, қолган масалаларни ҳал этиш бўйича масъуллар бириктирилди.
Шунингдек, 2 та тадбиркорга ер ажратиш масаласи ижобий ҳал қилинган бўлса, 5 нафар имконияти чекланган шахсга ногиронлик аравачалари топширилди.
Қабул доирасида туман кўп тармоқли марказий поликлиникаси шифокорлари томонидан чуқурлаштирилган тиббий кўриклар ташкил қилиниб, 78 нафар фуқарога тиббий хизматлар кўрсатилди. Бўш иш ўринлари меҳнат ярмаркасида натижасида эса 73 нафар фуқарога ишга жойлашиш учун йўлланмалар берилди.
Изоҳ (0)