Қизилўрда вилоятида Ми-8 вертолётининг ҳалокатида вафот этган беш нафар ҳарбий Толдиқўрғон вилоятидан бўлган. Январь ойида улар Ақтау шаҳрига кўчирилган, деб хабар беради «Zakon.kz».
Катта сержант Мурат Шарипов 40 ёшда, кичик сержант Асхат Абдулманат — 37 ёшда, ефрейторлар Мирасу Жуматаев — 28, Куаниш Саркитбаев — 33, Айдин Абдилданов 41 ёшда эди.
Ҳалок бўлган 37 ёшли Асхат Абдулманатнинг ортида унинг 15 йил бирга ҳаёт кечирган турмуш ўртоғи Элвира ва тўрт фарзанди қолган.
У Ақтауга учиб кетаётганида видео юборди «Мана, биз учиб кетяпмиз» деб. Шундан сўнг у алоқага чиқмади. Кечқурун соат 11 да унинг ўлими ҳақида хабар келди. Ўғлим ўлганига ҳали ҳам ишонмайман. 1 январдан у Ақтауга кўчиб ўтди. Икки ой ўтди, мана энди у йўқ», — дейди марҳум Асхат Абдулманатнинг онаси.
28 ёшли ефрейтор Мирас Жуматаевнинг қариндошлари ҳали ҳам содир бўлган воқеага ишонмайди. Интернетдаги дастлабки хабарларда унинг фамилияси Жуматов деб ёзилган. Қариндошлар эса энг сўнгги дамгача Мираснинг тирик эканлигига умид қилган.
Мирас охирги марта қариндошлари билан кечқурун соат 17:00 алоқага чиққан.
«Ҳаммаси яхши, Ақтаудан парвоз қилдик», — деган у онасига. Мираснинг онаси, ўғлининг Ақтауга кўчиб ўтишни истамаганлигини хотирлайди.
Сайлау Сидиқова, марҳум Мирас Жуматаевнинг онаси:
— Фарзандларимиз билан ҳаммаси яхши эканига ишондик. Ўғлим Ақтауга ўз хоҳишига қарши борган. У Ақтау шаҳрида хизмат қилишни хоҳламаган. Мен ҳам уни қўйиб юбормоқчи эмасдим.
Ҳалок бўлган 40 ёшли катта сержант Мурат Шариповнинг яқинлари журналистларга интервью беришдан бош тортди. Маълум бўлишича унинг ортида турмуш ўртоғи ва тўрт боласи қолган. Қариндошлари унинг жасадини охирги йўлга ҳурмат билан кузатиш учун кутмоқда.
Қозоғистон Республикаси Мудофаа вазири Нурлан Ермекбаев ҳалокат бўйича тергов бошланганини маълум қилган. Барча жабрланганларнинг оилаларига моддий ёрдам кўрсатилади. Президент Қосим-Жомарт Тўқаев жабрланганларнинг оилаларига таъзия билдирган.
Изоҳ (0)