Қашқадарёнинг Деҳқонобод туманида 2018–2019 йилларда жами 27 та кўприк қурилиши режалаштирилган бўлиб, 26 март куни ўн учинчи кўприк аҳоли ихтиёрига топширилди. Бу ҳақда кўприк очилишида иштирок этган «Дарё» мухбири хабар бермоқда.
— 1990 йилдан аҳоли истиқомат қилишни бошлаган «Мустақиллик» маҳалласидаги 100 га яқин хонадон аҳли фарзандларининг Кичик ўра дарёсидан ўтиб, мактабга қатнашидан хавотирланарди, — дейди меҳнат фахрийси Боймурод Жўраев. — Дарёга сув кўп келиб қолишидан чўчиган онаизорлар фарзанди мактабдан қайтмагунча юрагини ҳовучлаб ўтирарди. Бугун ўша хадик йўқолди. Боиси, туман ҳокими Зоир Алиқулов ташаббуси билан бошланган «Мустақиллик» маҳалласи ва туман марказини боғловчи 40 метрли кўприк қурилиши 26 март куни якунланиб, фойдаланиш учун аҳоли ихтиёрига топширилди.
Деҳқонобод тумани ҳокими Зоир Алиқуловнинг маълумот беришича, биргина 2018 йилнинг ўзида туманнинг чекка қишлоқларида 12 та кўприк қурилиб, аҳоли фойдаланиши учун топширилган. Маълум қилинишича, туман маркази ва «Мустақиллик» маҳалласини боғловчи баландлиги 3, узунлиги 40 метр бўлган кўприк қурилиши учун маҳаллий бюджетдан 130 миллион сўм ажратилиб, қурилиш ишлари 3 ой давом этган.
Аҳоли вакилларидан бири Мавлуда Норқулованинг айтишича, мазкур кўприк муаммоси 5 йилдан бери ҳал этилмай келаётган муаммо бўлиб, ўтган вақт давомида аҳоли барча мутасадди ташкилот раҳбарларига мурожаат қилган.
— Туман ҳокимлигидан тортиб, президент порталигача мурожаат қилдик, — дейди Мавлуда Норқулова. – «Ана қилиб берамиз, мана қилиб берамиз», деб 5 йил вақт ўтказишди. Шукурки, бугун ўша чарчоқларимиз чиқди. Фарзандларимизнинг сув кечиб юриши бизни жуда ташвишлантирарди. Энг ёмони фарзандларимиз ҳали ёш бўлса-да оёқ оғриғини топиб олишганди.
Эслатиб ўтамиз «Дарё»да чоп этилган мақолада туманнинг Чоштепа қишлоғидаги узунлиги 170 ва 110 метрлик кўприклар хусусида сўз борганди. Мазкур қишлоқдаги кўприклар замонавий типдаги кўприкларга айланадими ёки йўқми буниси ҳозирча номаълум. Бироқ, ҳокимлик мутасаддиларининг айтишича туманда яна 14 та кўприк қурилиши режалаштирилган бўлиб, кўприк қуриш ишлари 2019 йил якунланади.
26 март куни шунингдек, Деҳқонобод туманининг Бойқўрғон қишлоғида 100 ўринли ва туман марказида 50 ўринли 2 та нодавлат боғча ҳам ўз фаолиятини бошлади. Эътиборли жиҳати Бойқўғондаги 100 ўринли нодавлат боғча раҳбарияти 35 нафар кам таъминланган оила фарзандлари учун ойлик бадал тўловини 100 минг сўмдан 35 минг сўмга туширган.
Изоҳ (0)