8 апрелда Тошкентда ҳар йилги Adweek маркетинг ва реклама ҳафталиги бошланади. Ҳафталик тадбирлари мобайнида маркетинг ва реклама тўғрисида кўплаб мунозаралар ва тақдимотлар ўтказилади. Ушбу кенг миқёсдаги тармоқ ҳодисаси арафасида ташкилотчилар www.adweek.uz сайтига кирганларнинг энг оммавий саволларига жавоб беради.
Нега Adweek ҳафталиги давомида бир вақтда иккита: маркетинг ва реклама бўйича конференция ўтказилади?
Ҳаммага маълумки, реклама — бу маркетингнинг узвий қисми бўлиб, уларни ажратиш доимо баҳс-мунозарага сабаб бўлган. Аммо исталган корхонанинг маркетинг масалаларини фундаментал даражада ҳал қиладиганлар тушунадилар: реклама билан шуғулланишдан олдин бозорни ўрганиш, компания имкониятларини аниқлаш ва ривожланиш стратегиясини тўғри танлаш бўйича катта ишларни амалга ошириш керак бўлади. Реклама корхона маркетинг стратегиясини татбиқ этишнинг бир қисмигина, холос (у ҳам ҳар доим эмас). Лекин, шу билан бирга, савияли реклама кампанияси бозорда муваффақиятли ўрин эгаллашнинг ва сотувлар жараёнининг ядросига айлана олганлигига кўпгина мисоллар мавжуд.
Шу сабабли маркетинг конференциясининг дастури кўпроқ бизнесни, унинг ривожланиши стратегиясини ва бренднинг бозорда оптимал ўрин эгаллаши масалаларини ўрганиш масалаларини қамраб олади. Реклама конференцияси эса, ушбу бизнес-вазифаларни ҳисобга олган ҳолда, энг самарали креатив ечимларни яратиш масалаларини батафсил кўриб чиқади. Замонавий дунё конференция ўтказиш тажрибаси ҳам шундай тақсимланиш йўлини тутади.
Нега бу йил Adweek конференцияларида қатнашиш пуллик?
Бепул ва пуллик конференциялар ўртасидаги фарққа батафсил тўхталадиган бўлсак, у асосан ташкилотчилар кўзлаган мақсадларда кўринади. Adweek конференциялари ташкилотчилари учун пуллик иштирок шаклига ўтилиши ҳам дастурнинг ўзи, ҳам конференция аудиторияси шаклланишининг янги бсосқичи бўлди. Таклиф этилаётган контент сифатини ошириш ва халқаро миқёсдаги экспертларни маърузачи сифатида таклиф этиш вазифасини ўз олдига қўйгач, ташкилотчилар қаршисида юксак мотивацияланган, олинадиган ахборот ва амалий билимларнинг қадрини ҳис этадиган аудитория шаклланиши масаласи юзага келди. Бунда конференцияга кириш нархи рамзий кўринишда бўлиб, маркетинг, реклама ва умуман бизнес соҳасида фаол иш юритувчилар учун ҳамёнбоп саналади.
Қолаверса, амалда бепул конференциялар мутлақо бўлмайди. Ҳар қандай бепул конференция ташкил этилиши ортида шу тариқа ўзининг маркетинг ва реклама масалаларини ҳал этаётган компания, лойиҳа ёки бренд туради. Adweek спикерлари Ўзбекистонга ўз тажрибалари ва қимматли билимларини бизнинг мутахассисларимиз ҳамда маркетинг ва реклама соҳасига қизиқувчи ҳар ким билан ўртоқлашиш учун келадилар ва уларнинг аксарияти юртимизга биринчи бор ташриф буюради. Улар ўзларини, ўз компаниялари ёки мижозларини реклама қилмайдилар, интернетда эркин фойдаланишда учрамайдиган билимларни улашадилар. Хўп денг, бу анчайин қадрли ахборот манбаи ва унинг учун минимал, конференция чоғида ахборотни тўлақонли ҳамда самарали қабул қилиш ва фикр алмашишга шароит яратиш учун зарур миқдорда тўлов олинади.
Иш кунида конференцияда қатнашиш ўзини қанчалик оқлайди?
Аввало, маркетинг ва реклама конференциялари компанияларда стратегия ва илгарилатишга масъул мутахассислар учун мўлжалланган. Бу масалаларни ҳар доим ҳам одатий ва доимий усуллар билан самарали ҳал қилиб бўлмайди. Ҳар бир ўзини қадрловчи маркетолог, биринчи навбатда, бутун компанияни ривожлантириш стратегиясини ишлаб чиқиш ва ҳаётга татбиқ қилишда қатнашувчи мутахассисдир. Ва йилда бир мартагина мутахассисларимиз янги ғоялар ғамлаб олиш, воқеий муваффақият тарихлари билан танишиш, маркетинг ва реклама борасида бундай ҳажмда руҳланиш касб этиш имконига эга бўладилар. Қолаверса, буларнинг бари шу ерда, Тошкентда рўй беради ва бунинг учун узоққа бориш, бутун дунёдан семинарлар излаш ва соатлаб интернетда ўтириш зарур бўлмайди. Жаҳон миқёсидаги барча «юлдуз»ларнинг ўзи, бизнинг шароитимизга мослаштирилган контент билан бўлашиш ва иккита конференция давомида маҳаллий мутахассислар саволларига бевосита жавоб бериш учун, меҳмонга келадилар.
ABC Show’даги жаҳоннинг энг яхши рекламалари билан танишиш нега зарур?
Биринчидан, бу ноёб тадбир Ўзбекистонда биринчи бор ўтказилмоқда ва шу сабабли, ноодатий формат кўплаб саволлар туғдирмоқда. Жаҳоннинг энг яхши рекламалари коллекцияси – бу нима ва ким учун?
11 апрель, соат 18:30 да кино саройида энг яхши реклама видеороликлари кўрсатилади. Унда энг кўп тақдирланадиган реклама роликлари – дунёнинг 45 та етакчи фестивали ғолиблари намойиш этилади. Бу жаҳоннинг етакчи компаниялари, йирик жаҳон бозорларида муваффақиятли сотувлар тажрибасига эга халқаро креатив агентликларнинг муваффақиятли ишлари натижасини кўриш имкониятидир.
Сифати ҳайратда қолдирадиган роликлар, катта экранда, мутахассислар изоҳлари билан – бу оқшомни бутун дам олиш кунларига татигулик ҳиссиётлар оғушида ўтказишнинг ажойиб ғояси бўлибгина қолмай, балки реклама «ошхонаси» сирларини билиш, энг йирик жаҳон брендлари қандай сотишларини кўриш, реклама киносининг энг уста профессионаллари ишларидан лаззатланиш ва жаҳондаги энг яхши реклама ечимларидан илҳомланиш ҳамдир.
Бу йил Маркетинг ва реклама кўргазмаси ўтказиладими?
Мамлакатда ягона Маркетинг ва реклама кўргазмаси бу йил, анъанавий равишда, халқаро маркетинг конференцияси билан бирга, International Hotel Tashkent’да, 8—10 апрель кунлари ўтади. Кўргазмага кириш бепул.
Сўзимиз якунида айтиш ўринлики, бизнес билан шуғулланадиган, тобора кучайиб бораётган рақобат шароитида ўзи ва ўз бизнесини ривожлантиришни, товар ва хизматларини илгарилатишни истайдиган, Ўзбекистонда маркетинг ва реклама соҳасининг келгуси тақдирига бефарқ бўлмаган барча-барчани Adweek ҳафталиги тадбирлари давомида ноёб билимлар, ҳиссиётлар ва таассуротлар уйғунлиги кутади.
Adweek маркетинг ва реклама ҳафталиги ҳақида батафсилроқ ахборот, конференция дастури ҳамда кўргазма ва ABC show тўғрисидаги маълумотни www.adweek.uz сайтидан олиш мумкин. Биринчи Тошкент реклама фестивали тўғрисидаги барча ахборот — www.tafest.uz чипталарни www.myticket.uz сайтида ҳарид қилиш мумкин.
Изоҳ (0)