Самарқанд автомобиль заводи («SamAvto») ташкил этилганига 20 йил тўлди. Шу муносабат билан заводда юбилей санага бағишланган тантанали маросим ўтказилди.
Фото: «Zarnews.uz»
«Zarnews.uz»нинг хабар беришича, маросимдан сўнг япониялик ҳамкорлар Самарқанд вилояти ҳокимлиги ва «Ўзавтосаноат» вакилларига Isuzu Motors’нинг D-MAX автомобилини кўрсатиб, келгусида заводда ушбу турадги автомашиналарни ҳам ишлаб чиқаришни режалаштирилаётганини маълум қилган.
Маълумот учун, Самарқандда Isuzu D-MAX пикаплари ишлаб чиқарилиши мумкинлиги ҳақидаги хабарлар илк бор 2017 йил январида пайдо бўлганди. Ўшанда «Ўзавтосаноат» компанияси матбуот хизмати иккита автомобиль намуна тариқасида Ўзбекистонга олиб келингани, уларни ишлаб чиқариш ҳақидаги гап-сўзлар «ҳеч қандай асосга эга эмаслиги»ни маълум қилганди.
Фото: Telegram
Қайд этиш жоиз, Ўзбекистон бош вазири Абдулла Ариповнинг 2017 йил ноябрида Германияга амалга оширган ташрифи якунларига кўра, Самарқандда Volkswagen Amarok пикапини ишлаб чиқариш бўйича келишув имзоланган эди. Ўшанда ушбу лойиҳа 2018—2019 йилларда амалга оширилиши режалаштирилаётгани таъкидланган эди.
