Қашқадарёда «Иттифоқ таълим гранти» лойиҳаси асосида 17 нафар талаба тўлов-шартнома пулининг 50 фоизи тўлаб бериладиган бўлди. Бу ҳақда Қарши шаҳридаги «Ёшлар маркази»да ташкил этилган «Иттифоқ таълим гранти» лойиҳаси комиссиясининг йиғилишида маълум қилинди.
Ёшлар иттифоқи вилоят кенгаши матбуот котиби Аҳрор Содиқовга кўра, шартнома пулининг 50 фоизи тўлаб берилаётган 17 нафар талаба чин етим, ногиронлиги бўлган ҳамда меҳрибонлик уйида тарбияланган, боқувчисини йўқотган талабалар бўлиб, лойиҳадан кўзланган мақсад уларни қўллаб-қувватлашдан иборат.
Маълум бўлишича, комиссияга 19 нафар талаба ҳужжат топширган бўлиб, талабаларнинг ҳужжатлари ўрганиб чиқилганда 2 нафар талабанинг ҳужжатлари Низом талабларига жавоб бермагани учун рад этилган.
— «Иттифоқ таълим гранти» лойиҳаси кўнгли ярим, ўқиш нияти юқори, турмуш ташвиши эрта елкасига тушган талабалар учун катта рағбат бўлди, — дейди Ёшлар иттифоқининг вилоят Кенгаши раиси, комиссия раиси Шомурод Сатторов. – Даъвогарларни лойиҳанинг Низоми асосида адолатли ва шаффофлик билан саралаб олишга алоҳида эътибор қаратилди.
Йиғилишда айтилишича, даъвогар талабаларнинг ҳужжатлари республика комиссиясига тақдим этилгач, жорий йилнинг 20 мартига қадар уларга тўлов-шартнома маблағларининг 50 фоизигача бўлган миқдори тўлаб берилади.
Изоҳ (0)