Москвада Россия ва Ўзбекистон ўртасидаги банклараро ҳамкорлик бўйича кичик комиссиясининг йиғилиши бўлиб ўтди. Бу ҳақда Марказий банк матбуот хизмати маълум қилди.
Йиғилишда икки мамлакат марказий банклари, молия ва иқтисодий ривожлантириш вазирликлари, банклари, шунингдек, Ўзбекистон валюта биржаси ва Москва биржаси вакиллари иштирок этди. Йиғилишга Ўзбекистон Марказий банки раисининг биринчи ўринбосари Тимур Ишметов ва Россия Банки раисининг биринчи ўринбосари Ксения Юдаева ҳамраислик қилди.
Анжуман чоғида томонлар кенг доирадаги, хусусан банклараро ҳамкорлик, миллий тўлов тизимларини ривожлантириш, банк назорати ва улар фаолиятини тартибга солиш, жумладан, трансчегаравий банкларни биргаликда назорат қилиш, молиявий оммабопликни ошириш, ходимлар малакасини ошириш соҳаларига тегишли масалаларни муҳокама қилдилар.
Йиғилиш доирасида томонлар банк назорати соҳасида Россия Федерацияси ва Ўзбекистон Республикаси марказий банклари ўртасида банк назорати борасида, шу жумладан трансчегаравий банкларни биргаликда назорат қилишда қўлланилаётган ёндашувлар бўйича ўзаро тажриба алмашиш ва яқин ҳамкорлик ўрнатиш имконини яратадиган ўзаро англашув тўғрисида меморандум ишлаб чиқишни келишиб олди.
Россия ва Ўзбекистоннинг тўлов карталари миллий тизимларини тизимлараро интеграциялаш ва тўлов тизимлари соҳасидаги ёндашувларни тартибга солиш ва кузатиб бориш (назорат) бўйича ҳамкорлик тўғрисида битим ишлаб чиқишга келишиб олинди.
Томонлар ходимлар малакасини ошириш соҳасида Россия Марказий банки ва Ўзбекистон Марказий банки ўртасидаги ҳамкорлик тўғрисида битим имзолади.
Йиғилиш иштирокчилар томонидан ижобий баҳоланди ва мазкур ташаббус банклараро ҳамкорликни ривожлантириш ва мустаҳкамлашга шароит яратишини қайд этилди. Кичик комиссиянинг навбатдаги мажлиси Тошкентда бўлиб ўтади.
Изоҳ (0)