Дунё бўйича энг арзон мобил интернет рейтинги тузилди

Британиянинг Cable.co.uk тадқиқот компанияси мобил интернет арзонлиги бўйича дунё мамлакатлари рейтингини тузди, деб хабар берди «Коммерсантъ».

Унга кўра, энг арзон мобил интернет Ҳиндистонда эканлиги аниқланди. Энг қиммати эса Африка, Шимолий Америка ва Ғарбий Европа давлатларида эканлиги маълум бўлди.

Cable.co.uk мутахассислари 1 гигабайт мобил интернетнинг доллардаги ўртача қийматини таҳлил қилишди ва у ёки бу мамлакатдаги мобил интернет тарифларнинг қиммат ёки арзонлиги бўйича дунё харитасини тузишди.

Тадқиқотчилар шу мақсадда Ҳиндистондаги 57 та, Руандада 36 та, Россиядаги 31 та ва ҳоказо тариф режаларини ўрганиб чиқишларига тўғри келган.

Рейтингдан 230 та давлат ўрин олган бўлиб, биринчи поғонани Ҳиндистон эгаллаган (1 гигабайт учун ўртача нарх 0,26 доллар). Ундан кейинги ўринларни Қирғизистон (0,26 доллар), Қозоғистон (0,49 доллар) ва Украина (0,51 доллар) эгаллаган.

Cable.co.uk таҳлилчиларининг таъкидлашича, Осиё минтақаси мобил интернет нархи арзонлиги бўйича етакчилик қилмоқда. Ушбу рейтингнинг Топ-20 талигига кирган аксарият давлатлар Осиёда жойлашган.

Бунда Африканинг Руанда (0,56 доллар, тўртинчи ўрин), Судан (0,68 доллар, бешинчи ўрин) ва Конго Демократик Республикаси (0,88 доллар, ўнинчи ўрин) ҳамда Европанинг Финландия (1,16 доллар, 14-ўрин) ва Монака (1,21 доллар, 16-ўрин) давлатлари истисно бўлган холос.

Рейтингнинг энг сўнгги 230-поғонасини Африканинг Зимбабве давлати эгаллаган бўлиб, унда 1 гигабайт мобил интернетнинг ўртача нархи 75,2 долларни ташкил этади.