8 март — Халқаро хотин-қизлар куни муносабати билан Ўзбекистон Қуролли Кучлари академияси ва Чирчиқ олий танк қўмондонлик-муҳандислик билим юрти курсантлари, Қуролли Кучлар Марказий ашула ва рақс ансамбли ҳамда Мудофаа вазирлиги Марказий ҳарбий оркестри жамоалари Тошкентдаги бир неча савдо марказларида бўлиб, бу ердаги аёл-қизларни ўзгача услубда табриклашда давом этмоқда. Бу ҳақда Мудофаа вазирлиги матбуот хизмати «Дарё»га маълум қилди.
«Экобозор» савдо мажмуаси ҳовлисида янграган шўх куй ва қўшиқлар кундалик юмушлари билан оввора бўлиб юрган харидорларни бир жойга жамлаб, уларга байрам кайфиятини улашди. 8 март — Халқаро хотин-қизлар байрами муносабати билан билдирилган қутловлар, ҳарбий созандалар томонидан ижро этилган жаҳон ва ўзбек классик мусиқалари йиғилганларнинг олқишларига сазовор бўлди.
Табрик ва куй-қўшиқлардан хурсанд бўлган аёл-қизларга Чирчиқ олий танк қўмондонлик-муҳандислик билим юрти курсантлари томонидан гуллар туҳфа этилди.
Худди шундай байрамона акция пойтахтнинг Миробод туманида жойлашган «Компасс» савдо мажмуасида ўтказилди. Шунингдек, Марказий ҳарбий округ ҳарбий оркестри жамоаси томонидан Самарқанд шаҳридаги Регистон майдони ҳамда «Atlas» кўнгилочар савдо мажмуасида концерт дастурлари намойиш этилди.
Изоҳ (0)