Ўзбекистонлик ҳарбий хизматчилар Россиянинг Челябинск шаҳри яқинидаги Чебаркуль полигонида армия авиацияси ҳамда артиллерия ҳамкорлигида ўтказилган танк бўлинмаларининг тактик машғулотларини кузатди. Бу ҳақда «Дарё»га Мудофаа вазирлиги матбуот хизмати маълум қилди.
Машғулотлар жараёнида шартли душман авиация ҳужуми ва оммавий қирғин қуролларидан фойдаланганида асосий кучнинг ҳаракатлари амалда кўрсатилди.
Машғулотнинг сўнгги босқичида ҳарбий хизматчилар «Т-72Б» танклари ҳамда «БМП-2» пиёдалар жанговар машиналаридан шартли душманнинг имитация қилинган зирҳли ва жонли кучларига қарата ўточди. Бунда ҳаводан «Ми-24» авиация вертолётлари ёрдам кўрсатиб турди.
Тажриба алмашиш жараёнида ўзбекистонлик ҳарбий хизматчилар россиялик танкчилар бўлинмаларининг жанговар тайёргарлиги жараёнлари, шунингдек, учувчисиз учиш қурилмалари ва шартли диверсион-разведка гуруҳларига қарши курашишнинг янгича усуллари билан танишди.
Тактик машғулотларга мингдан ортиқ ҳарбий хизматчи, 200 га яқин ҳарбий техника, хусусан, «Мcта-Б» гаубицаси, «Град» залп ўт очиш реактив тизими ҳамда бешинчи авлод алоқа техникаси жалб этилди.