Фарғонада Жанубий Кореяга ишга жўнатишга ёрдам беришини айтиб, фуқароларнинг 150 миллон сўмдан зиёд пулини ўзлаштирган фирибгар қўлга олинди. Бу ҳақда вилоят ИИБ «Дарё»га хабар берди.
Вилоят ИИБ матбуот хизматидан олинган маълумотга кўра, 1983 йилда Қува туманида туғилган фуқаро олдин ҳам Жиноят Кодексининг 168-моддаси тегишли бандлари билан 4 маротаба жиноий жавобгарликка тортилган.
Дастлабки тергов ҳужжатларига кўра, гумонланувчи хавфли рецидивист бўлгани ҳолда, такроран Жанубий Кореяга фуқаролар ўқиш ёки ишлаш учун бораётганда тузиладиган шартномани қалбаки усулда тайёрлаш ва ундан фойдаланиш бўйича жиноий режа тузган. Шу асосда у Жанубий Кореяда ишлашни ният қилиб юрган 6 нафар фуқародан 150 621 040 сўм пулни фирибгарлик, алдаш ва ишончни суиистеъмол қилиш йўли билан олган.
Фуқароларнинг 5 нафарига Жанубий Кореяда ишлаш ҳуқуқини берувчи инглиз тилида ёзилган расмий шартномаларни қалбаки усулда тайёрлаб берган.
Ҳозирда мазкур жиноят иши бўйича гумонланувчига нисбатан Жиноят Кодексининг 168-моддаси 4-қисми «а» банди (фирибгарлик, жуда кўп миқдорда), 228-моддаси 2-қисми «а» банди (расмий ҳужжатларни қалбакилаштириш ёхуд бундай ҳужжатларни сотиш ҳаракатларини такроран ёки хавфли рецидивист томонидан содир этилиши) ва 228-моддаси 3-қисми (ҳужжатнинг қалбаки эканлигини била туриб, ундан фойдаланиш) билан айб эълон қилинган.
Изоҳ (0)