Шайх ас-Сабоҳ Осиё ўйинларини Ўзбекистонда ўтказиш масаласини муҳокама қилиш учун Тошкентга келди, уни Ғофур Раҳимов ва Умид Аҳмаджонов кутиб олди

Бугун, 24 февраль куни Осиё Олимпия Кенгаши президенти Шайх Аҳмад ал-Фаҳад ас-Сабоҳ Тошкент келди. Бу ҳақда МОҚ хабар беради.

Шайх ас-Сабоҳ Ислом Каримов номидаги Тошкент халқаро аэропортида AIBA президенти Ғофур Раҳимов, МОҚ президенти Умид Аҳмаджонов бошчилигидаги Миллий олимпия қўмитаси мутасаддилари ҳамда оммавий ахборот воситалари ходимлари томонидан кутиб олинди. Ас-Сабоҳ билан бирга делегация таркибида Халқаро кураш ассоциацияси президенти, Осиё ўйинлари—2018 директори Ҳайдар Фармон, ОCА котиби Люсен Алварез ҳам Ўзбекистонга келди.

Маълумки, Ўзбекистон Республикаси Президенти Шавкат Мирзиёев томонидан Олий Мажлисга қилинган мурожаатномада мамлакатда соғлом турмуш тарзини тарғиб қилиш масалаларига алоҳида эътибор қаратилганди. Давлат раҳбари ўшанда Ўзбекистон Осиё ўйинларини ўтказа олишга қодир мамлакат эканлигини ҳам алоҳида қайд этиб ўтганди.

Шу муносабат билан Миллий олимпия қўмитаси раҳбарияти томонидан 2030 йилги Осиё ўйинларини Тошкент ва Самарқандда ўтказиш бўйича ариза Осиё Олимпия Кенгашига тақдим этилган. 2030 йилги Осиё ўйинларини қабул қилиш учун Ўзбекистондан ташқари Қатар, Ҳиндистон ва Филиппин каби мамлакатлар даъвогарлик қилмоқда.

Ўзбекистоннинг Осиё ўйинларига мезбонлик қилиш имкониятларини кенг муҳокама қилиш мақсадида Ас-Сабоҳ бошчилигидаги делегация икки кун давомида Ўзбекистонда бўлади.

Учрашув давомида мусобақа учун спорт иншоотларини қуриш, Олимпия шаҳарчаси, логистика, қулай транспорт маршрути, юқори савиядаги тадбирларни ташкил қила олиш, трансляция ва бошқа масалаларга алоҳида тўхталиб ўтилади.