Интернетда Қирғизистонда «резина» тухум пайдо бўлганлиги ҳақида хабар қизғин муҳокама қилинмоқда, деб ёзади Sputnik.
Қирғизистон фуқаросининг сўзларига кўра, пиширилган тухум сариғи «резина» бўлиб чиққан. Унинг фикрига кўра, бу тухумлар Хитойда ишлаб чиқарилган.
«Уюшмага бир неча марта келиб чиқиши номаълум ва сифати қониқарсиз бўлган тухумлар Ўзбекистон ҳудудидан келаётганлиги ҳақида хабар берилганди», — дейди Қирғизистон паррандачилик уюшмаси раиси Рустам Осмоналиев.
Унинг фикрига кўра, бундай ҳолатнинг сабаби паррандаларга бериладиган озуқада эмас. Тухумлар музлатгич камераларда узоқ муддат сақланган ёхуд Ўзбекистон ёки Хитойда синтетик йўл билан ишлаб чиқарилган.Агентлик ушбу ҳолатга ойдинлик киритиш мақсадида Ўзбекистон Ветеринария қўмитасига мурожаат қилган. Қўмита бу айбловларни рад этди.
«2018 йил ва жорий йилда Ўзбекистондан Қирғизистонга тухум экспорт қилинмаган. Тухум экспорт қилиш учун рухсатнома расмийлаштириш зарур. Шу давр мобайнида Қирғизистонга тухум экспорт қилиш учун рухсатнома олиш юзасидан мурожаат қилинмаган», — деб таъкидлади Ўзбекистон Ветеринария қўмитаси чегара ветеринария назорати бошқармаси бошлиғи ўринбосари Алижон Жўраев.
Жўраевнинг сўзларига кўра, Ўзбекистондан тухум Афғонистон, Тожикистон ва Эронга экспорт қилинади. Шунингдек, Ўзбекистондан Қирғизистонга фақат комбикорм, қурт ва биогумус ўғит экспорт қилинади.
Изоҳ (0)