Латвия Ўзбекистонга «Тошкент — Рига» йўналишида мунтазам темир йўл контейнер қатновини йўлга қўйишни таклиф этди. Бу ҳақда ушбу мамлакатнинг Ўзбекистондаги элчиси Михаилс Попковс маълум қилди, дея хабар беради «Халқ сўзи Online».
— Латвия ўз портлари орқали Европага ва бутун дунё бўйлаб Ўзбекистон экспорти учун логистика ва етказиб беришнинг кенг имкониятларини таклиф этяпти. Яқинда ўзбекистонлик шерикларимизга Алоқа вазирлиги ва «Латвия темир йўли» давлат компаниясининг «Тошкент — Рига» йўналишида мунтазам темир йўл контейнер қатновини йўлга қўйиш бўйича аниқ таклифларини етказдик. Кейин Рига эркин портидаги контейнер терминали орқали юклар қайта ишланади», — деди элчи.
Элчига кўра, Латвиядаги йирик транспорт ва логистика ташкилотлари, жумладан, портлар ва темир йўл компанияси раҳбарлари турли форумларда иштирок этиш учун Ўзбекистон ҳамда Марказий Осиёнинг бошқа давлатларига мунтазам келмоқда. Уларда ҳамкорликни янада ривожлантириш масалалари муҳокама қилинмоқда.
Маълумот учун, Ўзбекистон Латвиянинг Марказий Осиё минтақасидаги етакчи ташқи савдо ва иқтисодий ҳамкори саналади. Ўз навбатида Латвия Ўзбекистон билан товар айланмаси ҳажми бўйича Евроиттифоқ давлатлари ичида Германия ва Италиядан сўнг учинчи ўринда туради.
Изоҳ (0)