Жорий йил 21 январь куни «Касби пахта тозалаш» акциядорлик жамиятининг тарозихонасидаги кузатув камераси соат 11:56 дан 12:58 гача бўлган вақт оралиғида ишламаган. Бу ҳақда «Қашқадарё» газетаси сайтида маълум қилинди.
Бош прокуратура ҳузуридаги Агросаноат мажмуи ва озиқ-овқат хавфсизлиги таъминланиши устидан назорат қилиш инспекцияси вилоят бошқармаси ходимлари мазкур ҳолат юзасидан корхонада текширув ўтказди.
Текширувда аниқланишича, корхонанинг мансабдор шахслари олдиндан ўзаро тил бириктириб, кузатув камерасини бир соатдан кўпроқ вақт давомида ўчириб қўйган. Бу вақт давомида умумий нархи 213 миллион сўмдан ошиқ бўлган техник чигит сохта ҳужжатлар ёрдамида ноқонуний равишда корхонадан чиқариб юборилган ва кейинчалик гуруҳ аъзолари томонидан талон-тарож этилган.
Айни вақтда «Касби пахта тозалаш» АЖ мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, иш вилоят прокуратурасига юборилган.
Изоҳ (0)