2019 йилнинг 5 февраль куни Ўзбекистоннинг АҚШдаги элчихонасида Ўзбекистон Республикаси Олий ва ўрта махсус таълим вазирлиги ҳамда Webster университети ўртасида таълим хизматларини тақдим этиш тўғрисидаги Бош келишувни имзолаш маросими бўлиб ўтди. Бу ҳақда Ўзбекистон Республикаси ТИВ матбуот хизмати хабар берди.
Келишувнинг имзоланиши Ўзбекистонда Америка университетининг биринчи, доимий филиалининг очилишидан далолатдир.
Тадбирда Давлат департаменти, Таълим департаменти, USAID, Халқаро Таълим бўйича Америка кенгаши, Жаҳон Банки, ХВЖ, АҚШнинг таълим ва таҳлил доиралари вакиллари иштирок этди.
Тантанада АҚШга ишчи ташриф билан борган бош вазир ўринбосари Танзила Норбоева, бандлик ва меҳнат муносабатлари вазири Шерзод Кудбиев ва «Узтекстильпром» уюшмаси раиси Илҳом Ҳайдаров иштирок этди.
Webster университети Ўзбекистонда МДҲ мамлакатларидаги биринчи тўлақонли филиали бўлади. Унда бизнесни бошқариш, маркетинг ва тадбиркорлик, компьютер фанлари, журналистика ва медиа соҳа, соғлиқни сақлаш, STEM-таълим ва инновациялар ҳамда бошқа соҳаларда бакалавр ва магистратуранинг барча дастурлари тўлиқ таркибда ўқитилади.
Тошкент шаҳрида АҚШнинг Webster университети филиали очилиши ҳақида президент Шавкат Мирзиёевнинг 2018 йилнинг 20 сентябрь куни Нью-Йоркда бўлиб ўтган Ўзбекистон—АҚШ бизнес форумида келишув имзоланганди.
Изоҳ (0)