Сўнгги йилларда мамлакатимизда, энг аввало, иқтисодиётнинг барча тармоқларини жадал ривожлантириш, инвестициявий жозибадорлик ва ишбилармонлик фаоллигини ошириш, ишлаб чиқариш ва хизмат кўрсатиш соҳаларини кенгайтиришга қаратилган кенг кўламли ислоҳотлар амалга оширилмоқда.
Шулар қатори энергия самарадорлиги ва аҳолини узлуксиз электр энергияси билан таъминлаш борасида ҳам улкан ишлар олиб борилмоқда.
Хусусан, Давлат раҳбарининг 2016 йил 2 июндаги Қарорига асосан, «Таҳиатош ИЭС – ‘Хоразм’ нимстанция – Саримой аҳоли пункти (Хоразм вилояти) 220 кВтли электр узатиш линияси қурилиши инвестиция лойиҳасини амалга оширишга доир чора-тадбирлар тўғрисида»ги инвестиция лойиҳаси амалга оширилмоқда.
Лойиҳа доирасида умумий узунлиги 364 км бўлган 220 кВтли Таҳиатош иссиқлик электр станциясидан «Хоразм» нимстанцияси ҳамда Саримой аҳоли яшаш жойигача юқори кучланишли электр узатиш линияси қурилиши режалаштирилган.
Лойиҳада Хоразм вилоятида жойлашган «Хоразм» нимстанциясини кенгайтириш ва қайта қуриш ҳамда нимстанцияда жойлашган қуввати 125 МВАли маънавий эскирган иккита автотрансформатор ўрнига қуввати 200 МВА бўлган замонавий автотрансформаторларга ўзгартириш ва Саримой аҳоли яшаш жойига яқин 220 кВт ли қайта улагич пунктини қуриш режалаштрилган.
Лойиҳа бўйича 56 ишчи ўрни яратилиши кўзда тутилган.
Мазкур лойиҳа энерготизимнинг Шимолий-Ғарбий ҳудуди ҳамда Хоразм вилояти истеъмолчиларининг электр таъминоти ишончлилигини ошириш, Қорақалпоғистон Республикаси ва Хоразм вилоятида электр энергияси танқислигини камайтиришга хизмат қилади.
Шунингдек, магистрал электр тармоқлари фаолиятининг ишончлилигини ошириб, иқтисодиёт соҳалари истеъмолчилари ва аҳолини узлуксиз электр таъминоти билан таъминлайди ҳамда ускуналарнинг капитал таъмирлаш харажатларини камайтиради.
«Ўзбекэнерго» АЖ матбуот хизмати
Реклама ҳуқуқи асосида.
Изоҳ (0)