Андижон шаҳар ҳокими сектор ҳудудидаги кўчада 1,5 йилдан бери ичимлик суви исроф бўлмоқда

Андижон шаҳрининг «Саноат» маҳалласидаги Неъматжон Умаров ва Гогл кўчалари кесишмасидан ўтган сув қувури яроқсиз ҳолатга келиб, унинг чириши ва тешилиши натижасида 1,5 йилдан бери тоза ичимлик суви исроф бўлиб, оқиб ётмоқда. Бунинг оқибатида кўчаларда қатнов учун ноқулайлик юзага келган.

«Қуруқ ваъдаларни кўп эшитамиз»

— Уч йилдирки мазкур маҳалланинг раиси сифатида фаолият юритиб келмоқдаман, — дейди Маҳаммаджон Қодиров. – Бу ҳолат 2017 йилнинг ёзидан буён кузатилади. Тегишли ташкилотларга кўп бора мурожаат қилганмиз. Андижон шаҳар «Сувоқова» унитар корхонаси вакиллари келиб, ҳолатни бир неча марта жиддий ўрганишди. Лекин улар ҳар гал қувурни янгилашга ваъда бериб, тешикка пона қоқиб кетади. 10–15 кун ўтгач, пона чиқиб кетади ва тешикдан яна сув оқаверади. Қуруқ ваъдаларнинг қачон амалга ошишию, бу манзара яна қанча муддат давом этишини билмаймиз, очиғи.

«Бундан кейин ҳам оқаверади»

— Ичимлик сувининг исроф бўлиб оқаётганига ажабланманг, — дейди заҳарханда кулимсираб исмини сир тутишимизни айтган 50 ёшлар чамасидаги аёл. — Бу бир неча йиллардан буён кузатилаётган оғриқли ҳолат бўлса-да, аммо ҳеч бир давлат ташкилоти ҳал қилолмаяпти. «Сувоқова»дан ҳам келишди, аммо сув оқишда давом этяпти. Бундан кейин ҳам оқаверади. Ёзда чуқурларга тўпланиб қолган сув усти кўм-кўк моғор босиб, қўланса ҳид таралади. Топ-тоза обиҳаётнинг беҳуда исроф бўлишига йўл қўйиб берилаётгани ёки бунга ваъдабоз мутасаддилар кўз юмишаётганидан ҳайрон қоламан.

Ҳоким бувадан жўяли жавоб кутамиз!

Бугун юртимизда ичимлик суви захирасини кўпайтириш мақсадида тизимли ишлар амалга оширилиб, қишлоқ хўжалигида инновацион технологиялар кенг қўлланилаётган бир пайтда бундай манзарага барҳам берилмаётгани жуда ҳам ачинарли. Айниқса, бир ярим йилдан бери ечимини кутаётган муаммонинг йўл ёқасида эканлиги ва уни ижобий томонга ўзгартирилмаётгани кишини ҳайратлантиради. Мазкур маҳалла Андижон шаҳар ҳокимининг сектор ҳудуди таркибига кирар экан. Ҳар куни ОАВда сувни исроф қилмаслик ҳақида бонг урамизу, амалда эса бунинг аксини ўзимиз бажараётганимиз кулгили эмасми? Амалдорлар қачон оддий халққа ўрнак бўлишга астойдил интилади? Шунча сувнинг беҳуда оқиб кетаётгани ва бу исрофгарчилик учун ким жавоб беради? Ушбу муаммодан қачонгача ҳам аҳоли, ҳам экология азият чекади?

Биз бу саволларимизга мутасадди ташкилот раҳбарлари, хусусан ушбу ҳудудга сектор раҳбари этиб тайинланган Андижон шаҳар ҳокимидан жўяли жавоблар кутиб қоламиз.

Биз бу мавзуга яна қайтамиз...