Кеча, 31 январь куни Чирчиқ гарнизонида Мудофаа вазирлиги ва ҳарбий прокуратура органлари прокуратура ходимлари томонидан ҳарбий хизматчилар ва уларнинг оила аъзолари билан якка тартибда суҳбатлар ташкил этилди, деб хабар беради вазирлик матбуот хизмати.
Суҳбат мобайнида айрим ҳарбий оилаларда учрайдиган муаммолар бўйича ҳуқуқий кўмак берилиб, юзага келадиган айрим масалаларга қонуний ечим топиш, бандлик масалаларини таъминлаш, фарзандларни ҳарбий шаҳарчаларга яқин таълим муассасаларига жойлаштириш бўйича мурожаатлар ўрганилди.
Тадбир давомида ҳарбий қисм ҳарбий хизматчилари ўртасида ҳуқуқий саводхонликни оширишга қаратиб «Биз ҳуқуқимизни қандай биламиз?» мавзусида викторина ҳам ташкил этилди. Унда иштирокчилар тарихий асарлар, Конституцияга оид билимларини синовдан ўтказди.
Шунингдек, Чирчиқ гарнизони офицерлар уйида ҳуқуқбузарликнинг олдини олиш, бу борада қабул қилинган фармон ва қарорларнинг мазмун-моҳиятига бағишланган илмий-амалий анжуман ўтказилди.
Ўтган 2018 йил статистик маълумотларга кўра, Мудофаа вазирлиги қўшинларида ҳуқуқбузарликларнинг олдини олиш ва жиноятчиликка қарши курашиш борасида жами 16465 та профилактик тадбир ўтказилди. Шу жумладан, низомга зид муносабатлар профилактикасига оид 2405 та, ичкиликбозликка қарши 2095 та, наркотик, психотроп моддалар истеъмолига қарши 1623 та, жароҳатланишнинг олдини олишга қаратилган 2766 та, йўл-транспорт ҳодисасининг олдини олиш бўйича 2574 та, ҳуқуқий саводхонликни ошириш ва ижтимоий ҳимояни таъминлашга оид 2786 та тадбир ташкил этилган.
Изоҳ (0)