Қозоғистон бир томонлама тартибда ўз ҳудуди орқали Бишкек—Тошкент халқаро транзит йўналишидаги автобус қатновини тўхтатди. Бу ҳақда Қирғизистон транспорт вазирлиги хабар қилди, деб ёзмоқда Sputnik.
Бишкек—Тошкент халқаро автобус қатнови ўтган йилнинг апрель ойида Қирғизистон ва Ўзбекистон президентлари учрашуви якунлари бўйича очилганди.
Ушбу транзит йўналиши қўшни Қозоғистон ҳудуди орқали ўтади. Қатнов Қирғизистон ва Ўзбекистоннинг икки йирик транспорт компаниялари томонидан бошқарилади.
Вазирликнинг маълум қилишича, бундан аввал Қозоғистон томони ушбу йўналишда автобуслар қатновига ўзгартиришлар киритишни сўраган. Шундан сўнг Тошкент ва Бишкек янги қатнов жадвалини ишлаб чиқиб, ўтган йилнинг ноябрь ойида Қозоғистон ваколатли органларига юборган.
Янги жадвал ҳозирги вақтгача Қозоғистон томонидан маъқулланмаган.
Қирғизистон транспорт вазирлиги хабар қилишича, Қирғизистон ва Қозоғистон ваколатли органлари ўртасида бу масалани ҳал қилиш бўйича музокара жараёнлари амалга оширилмоқда.
Изоҳ (0)