«Дарё» таҳририятига Самарқанд вилояти Ургут тумани «Бунёдкор» маҳалласида яшовчи фуқаро Моҳигул Махманазарова мурожаат қилди. Унинг сўзларига кўра, тумандаги Мирзақишлоқ маҳалласида яшовчи фуқаро Илҳомжон Актамов биринчи турмуш ўртоғи билан қонуний никоҳда бўла туриб, унга алдов йўли билан уйланиб олган. Қизиқ томони шундаки, Илҳом Актамов биринчи турмуш ўртоғидан қонуний ажрашмасдан туриб, иккинчи турмуш ўртоғи билан ҳам никоҳдан ўтган. Натижада унда иккита турмушида ҳам никоҳни қайд этувчи қонуний гувоҳнома пайдо бўлган.
Мазкур ҳолат юзасидан «Дарё» мухбири Фарҳод Норбўтаев журналистик суриштирув олиб бориб, бир кишига никоҳни қайд этувчи иккита гувоҳнома қандай берилганлигига ойдинлик киритишга ҳаракат қилди.
2016 йилнинг ноябрь ойидан 2017 йилнинг январь ойига қадар маҳалладошимиз Олтин ака деган одам ота-онамнинг олдиларига мени келин қилиш мақсадида келишди. Ота-онам у кишига ўғли олдин уйланганлигидан хабардор эканлигини билганликлари учун мени ўғлига турмушга беришмаслигини кўп маротаба айтди. Бироқ шунга қарамай Олтин ака ўғлини қонуний ажралганлигини, мени келин қилиб олиб келса қонуний никоҳдан ўтказишларини айтишди. Орадан бир қанча муддат ўтгач мени янгам (келинойи) билан Ургут туман 1-сон ФҲДЁ бўлимига олиб келишди. Менга у ерда бир ходима оппоқ қоғозга қўл қўйдириб олди. 2017 йилнинг 3 февраль куни Илҳомжон Актамов билан никоҳимиз қонуний қайд этилиб, никоҳ тузилганлиги тўғрисида гувоҳномани олдик. Шундан сўнг мен бир ярим йил давомида Илҳом Актамов билан бирга яшадим.Маълум бўлишича, мавсумий иш билан шуғулланувчи Илҳомжон Актамовнинг биринчи турмуш ўртоғи ўзаро келишмовчилик сабаб кетиб қолган. Бироқ уларнинг никоҳига суд томонидан қонуний ажрим берилмаган. Бу орада унинг ота-онаси ўғлини уйлантириш пайида бўлиб, Моҳигул Махманазарованинг уйига совчиликка борган. Илҳомжон Актамов иккинчи турмушини ФҲДЁ орқали никоҳдан ўтказиш воқеасини қуйидагича сўзлаб берди.Моҳигул Махманазарова
Иккинчи турмуш қураётганимда паспортим йўқолиб қолди. Мен Ургут туман ИИБга бориб янги паспорт олдим. Бироқ паспортимда никоҳим қад этилганлиги тўғрисида маълумотни киритмадим. Иккинчи маротаба уйланишим аниқ бўлганидан сўнг туман ФҲДЁ бўлимига бориб, никоҳдан ўтиш бўйича ариза топширдим. У ердагилар ҳам аввал уйланганманми ёки йўқлигини сўрашди. Мен уйланмаганман деб айтдим.Илҳомжон Актамов
Янги паспорт олганингиздан сўнг нега никоҳ қайд этганлиги тўғрисидаги маълумотни киратмадингиз деган саволимизга Илҳомжон аввалига «эсимдан чиқиб кетибди» деб жавоб берди. Бир оздан сўнг яна шу саволимизга «паспорт алмашгандан кейин никоҳни қайд этиш бўйича маълумотни киритиш кераклигидан хабарим йўқ эди», деб жавоб берди. Аниқроғи, иккинчи турмушини ФҲДЁдан қандай қилиб ўтганлигини турли йўллар билан яширишга ҳаракат қилди. Қолаверса, никоҳни қайд этиш учун ФҲДЁга зарур бўлган барча ҳужжатларни куёв ва унинг отаси амалга оширганлигини, бироқ ўша ҳужжатни қай йўллар билан тўғрилаб келганлигини эслай олмаслигини билдирди. Қилмишини яшириш учун турли баҳоналар ўйлаб топди.
Мазкур масала юзасидан Ургут туман 1-сон ФҲДЁ бўлими раҳбари Сайёра Турсунова билан учрашиб, ҳолат юзасидан фикрлари билан қизиқдик.
Ушбу ҳолат биз учун кутилмаган ҳол бўлди. Илҳомжон Актамовнинг никоҳини қайд этиши лозим бўлган ҳужжатлари билан бўлимимиз инспектори Фариза Абдуллаева шуғулланган. Куёв қураётган никоҳи биринчи турмуш эканлигини билдириб, ҳатто туман «паспортстол»дан маълумотнома ҳам олиб келган. Айнан ушбу маълумотномага ишониб инспектор ҳужжатларни расмийлаштирган ва никоҳни қайд этувчи гувоҳнома тақдим этганУргут туман 1-сон ФҲДЁ бўлимида инспектор бўлиб ишлайдиган Фариза Абдуллаева бетоб бўлганлиги учун ишга келмаган экан. Шу боис у билан телефон орқали гаплашдик.Сайёра Турсунова, Ургут туман 1-сон ФҲДЁ бўлими раҳбари
Илҳомжон Актамов ва Моҳигул Махманазароваларнинг ҳужжатларини мен тўплаганман. Куёвнинг гапларига ишониб, у олиб келган маълумотнома асосида никоҳи биринчи марта қайд этилаётган экан деб ўйлаганман. Илҳомжон Актамовни ёлғон маълумот берса қонуний чора кўрилиши ҳақида ҳам огоҳлантиргандим. Аммо огоҳлантиришимга қарамасдан у менга ёлғон маълумотнома тақдим этган. Натижада қилган эътиборсизлигим сабабли туман ҳокимлиги томонидан жазога ҳам тортилдим.Жорий йилнинг 4 январь куни Ургут туман ҳокимлигида туман прокурори, аппарат ходимлари ва ФҲДЁ бўлими ходимлари иштирокида ўтказилган йиғилишда мазкур масала атрофлича муҳокама қилинган. Хусусан, туман 1-сон ФҲДЁ бўлимининг инспектори Фариза Абдуллаева ўзига юклатилган вазифани лозим даражада бажармасдан, ўз хизмт вазифаларига масъулиятсиз билан ёндашганлиги, яъни, Илҳомжон Актамовни муқаддам турмуш қурган ёки қурмаганлигини тўлиқ текширмаганлиги оқибатида мазкур қонун бузилиши ҳолатлари келиб чиққанлиги аниқланган. Йиғилишда ушбу ҳолатларни бошқа такрорланмаслиги учун ўз хизмат вазифасига масъулиятсизлик билан қараб, қонун бузилиш ҳолатига имкон яратганлиги учун Фариза Абдуллаевага нисбатан ҳайфсан интизомий жазо чораси қўлланилганлиги баён этилган.Фариза Абдуллаева
Қаловини топиб қор ёндирган Илҳомжон Актамов иккинчи турмуш ўртоғи билан қонуний ажрашиш йўлини топганлиги бизни ажаблантирди. Фуқаролик ишлари бўйича Тайлоқ туманлараро судининг судьяси С.Турсунов раислигида 2018 йилнинг 10 декабрь куни бўлиб ўтган суд қарорига кўра Илҳомжон Актамов ва Моҳигул Махманазароваларнинг никоҳи ҳақиқий эмас деб топилган. Бироқ Моҳигул Махманазарова мазкур суд бўлишидан 25 кун аввал, аниқроғи 2018 йилнинг 5 ноябрь куни ФИБ Тайлоқ туман судига ажралмаслиги тўғрисида ариза киритган. Суд Махманазарованинг ажралмаслиги тўғрисидаги аризасини инобатга олмай, Актамовнинг ажрашиш тўғрисидаги даъво аризасини қанотлантирган.
Мен келин бўлиб тушганимдан сўнг хомиладор бўлдим. Аммо турмуш ўртоғим бу хабарни эшитиб «болани олдириш учун қанча пул керак бераман, бориб олдириб кел, мен сени бола учун эмас, иш учун олганман» деб болани олдиришга кўп мажбурлади. Лекин мен болани олдирмадим. Шу алфозда 8 ой давомида менга айни ҳолатимга тўғри келмайдиган, мумкин бўлмаган оғир ишларни қилдирди. Бола 8 ойлик бўлганида менга тамаки суғиртиришди. Бу оғир иш туфайли болам нобуд бўлди. Ота-онамнинг берган тарбияси сабаб бўлган воқеаларни уларга айтмадим. Аммо улар кейинроқ барча воқеадан хабар топишди. Мен шифохонадан уйга келгач бир-икки кун ётдим. Орадан ўн кун ўтар-ўтмас ҳовлидаги битта уйни бузиб, эрим мени ҳам чақириб ғиштларни ташиш керак деб ғишт ташиттирди. Бундан ташқари, ҳам далага олиб чиқиб эркакларга ҳам оғирлик қиладиган ишларни қилдиришди.Ўйлаймизки, Ургут туман хотин-қизлар қўмитаси Моҳигул Махманазаровани қўллаб-қувватлайди, туман ҳокимлиги ва мутасадди ташкилотлар Илҳомжон Актамовнинг барчани алдаб, иккинчи турмушни қонунийлаштириб олганлиги, ўзининг ёлғонлари сабаб бир қизнинг номини булғаганлиги ва Моҳигул Махманазаровага нисбатан қилган ноҳақликларини атрофлича ўрганиб чиқади.Моҳигул Махманазарова
Изоҳ (0)