Ҳаёт йўли синовларга тўла. Инсон ҳар бир ҳолатга кўникади, тўсиқларни енгиб ўтишга ҳаракат қилади. Бунда инсон тобланади, сабр қилади ва янада иродали бўлади, курашишда давом этади.
«Kun.uz» сайти ижодий жамоаси Сурхондарё вилояти, Термиз шаҳрида бўлиб, неча йиллардан буён фарзандлари соғлиғи учун курашиб келаётган Олим Назаров билан учрашди.
Бу инсоннинг икки қиз ва бир нафар ўғли бор. Катта қизи 21, кейингиси 18 ва ўғли 12 ёшда.
Ҳа, фарзанд оила қувончи, ота-она орзуларини рўёбга чиқарувчи келажакдир. Фарзанд оёғига кичик тикан кирса ҳам, аввало, ота-онанинг ҳаловати йўқолади.
Олим Назаров ҳам иккинчи қизининг соғлиги учун ўн йил курашди. Унинг бош миясидаги касалликни даволаш учун барча чораларни кўради. Аллоҳга шукурки, ҳозир қизининг соғлиги яхши.
Аммо 2007 йил дунё юзини кўрган фарзанди оёғида туғма нуқсон, яъни икки томонлама маймоқлик касаллиги билан туғилади.
Ота бу синов олдида ҳам эгилмади, синмади. Ўғли Гажкули Одинаевни туғилганидан бошлаб даволатишга ҳаракат қилди. Бир неча бор жарроҳлик амалиётлари ўтказилди. Аммо маймоқлик аломатлари кетгани йўқ.
Бироқ бу синовларнинг ҳаммаси эмас эди. Гажкули 3 ёшга тўлганида унда ичак патологик касаллиги аниқланади. Олим Назаров фарзандининг соғлигини тиклаш учун ҳозирга қадар ҳаракат қилмоқда.
Ҳозир Гажкули 12 ёш. Шу вақтга қадар унинг оёқ ва қорин қисмида 10 дан зиёд жарроҳлик амалиёти ўтказилган. 48 маротаба тиббий муолажаларни бошидан кечирган.
Фарзанди соғлиги учун курашаётган ота шу вақтга қадар тиббий муолажа ва жарроҳлик амалиётлари харажатлари учун яшаб турган ҳовлиси ва кўп қаватли уйдаги хонадонини сотган. Айни вақтда оила уйсиз, Термиз шаҳридаги кўп қаватли уйлардаги хонадонлардан бирида ижарада яшамоқда.
Ҳозирда Гажкулининг аҳволи кундан кунга оғирлашиб бормоқда. Олим Назаров Россиядаги клиникалардан биридаги мутахассислар билан боғланган. Даволаш имкони бор, аммо бунинг учун маблағ зарур. Олим Назаровнинг айтишича, ўғлини Россияда даволатиш учун 10 минг АҚШ доллари миқдорида маблағ керак.
«Фарзандимнинг соғлигини тиклаш учун охиригача курашаман. Ўғлим яхши бўлиб кетса, шу менинг бахтим. 18 йилдан буён шифохоналар эшигидаман. Аввал қизим, кейин эса ўғлимни даволатяпман. Бирор иш билан ҳам шуғулланолмайман. Бор-будимни сотдим. Менга фарзандларим соғ бўлса бўлгани, қолгани топилади. Аммо ҳозир қўлимдаги бор маблағни сарфлаб бўлдим. Яқинда россиялик шифокор билан боғландик. Энди ўғлимни даволаш учун Россияга боришимиз керак. Бироқ самолёт чиптаси учун ҳам пулим қолмади. Вақт эса ўтиб боряпти, ўғлимнинг аҳволи кундан кунга оғирлашиб бормоқда. Шу вақтгача ўзим курашдим. Энди яхши инсонлар кўмагига муҳтожман», – дейди Гажкулининг отаси Олим Назаров.
Меҳр-оқибат, хайр-у саховат кўрсатиш, ўзаро оқибатлилик, яхшилик қилиш каби фазилатлар бағрикенг халқимизга хос.
Келинг, азизлар, айни вақтда фарзанди соғлиги учун курашаётган отага ёрдам қўлини чўзайлик. Саховат кўрсатиб, оғирини енгил қилайлик.
Қўшимча маълумотлар:
Телефон: +99894 515 00 71 (Олим Назаров)
Click/PayMe: 8600 0417 8158 9628 (Агробанк)
МФО: 00325
ИНН: 200075163
Нақд пул топширганда: 23116000000000325001
Мижоз аризасига асосан картадан картага пул ўтказилганда: 23118000800000325001
Бошқа ташкилотлардан келиб тушган маблағ транзити: 23120000400000325001
Изоҳ (0)