Нукусдаги БМТ Тараққиёт дастури биносида Ўзбекистон Республикаси Президенти ҳузуридаги Оролбўйи халқаро инновацион маркази фаолиятининг дастлабки босқичига бағишланган давра суҳбати бўлиб ўтди. Бу ҳақда ЎзА хабар бермоқда.
Тадбирда Ўзбекистон Республикаси Фанлар академиясининг Қорақалпоғистон бўлими, Қорақалпоқ давлат университети, Тошкент Ахборот технологиялари университетининг Нукус филиали, Нукус педагогика институти, Сув хўжалиги вазирлиги қошидаги Мелиоратив экспедиция, Уруғчилик ривожлантириш марказининг Қорақалпоғистон Республикаси ҳудудий бошқармаси, Гидрометеорология бўйича Қорақалпоғистон Республикаси бошқармаси, Ирригация ва сув муаммолари илмий-тадқиқот институтининг Қорақалпоғистон филиали, Ўзбекистон Қишлоқ хўжалиги илмий-тадқиқот институтининг Қорақалпоғистон бўлими мутахассислари иштирок этишди.
Унда кенг жамоатчилик Халқаро инновацион марказнинг фаолияти билан таништирилди. Инновацион ривожланиш вазирлиги матбуот хизматининг хабар беришича, тадбир давомида марказнинг ташкил топиши ва унинг асосий фаолият йўналишлари, шунингдек тузга чидамли ўсимликлар экилган Мўйноқдаги тажриба ер майдонларида амалга оширилган ишлар тўғрисида маълумотлар берилди.
Йиғилишнинг иккинчи қисмида турли ташкилотлардан ташриф буюрган мутахассислар ўз соҳаларидаги ютуқлар ҳақида маълумот берди, Оролбўйи халқаро инновацион маркази фаолиятини такомиллаштиришга оид фикр-мулоҳазаларини билдириб, келгусидаги ҳамкорлик бўйича таклиф ва ғояларини ўртага ташлади. Энг долзарб экологик муаммолар муҳокама қилиниб, зарур тавсиялар билдирилди.
Изоҳ (0)