Туркия Сурияда хавфсизлик ҳудудини мустақил равишда яратишга қодир, бироқ бошқа давлатлар билан ҳам ҳамкорлик қилишдан бош тортмайди, дея хабар беради «ТАСС».
«Хавфсиз ҳудуд — Ражаб Тоййиб Эрдўғон ғояси. Агар АҚШ ёки бошқа давлатлар биз билан ҳамкорлик қилмоқчи бўлса биз бунга қарши эмасмиз, аммо биз бу ҳудудни мустақил ярата оламиз», — дейди Республика ташқи ишлар вазири Мевлут Човушўғлу.
Ташқи сиёсий идора раҳбари ҳозирча манфаатдор томонлар билан музокаралар олиб борилаётгани, бироқ аниқ битимлар йўқлигини маълум қилган.
Туркия президенти АҚШ президенти Дональд Трамп билан 15 январь куни бўлиб ўтган музокаралардан сўнг, Суриянинг шимолида буфер зонасини яратиш ниятини тасдиқлаган. Республика президентининг сўзларига кўра, Анқара ердаги хавфсизликни таъминлашга тайёр, Америка томони эса ҳаво кенглигида. Шу билан бирга, Туркиянинг расмий вакили Иброҳим Калиннинг айтишича, буфер зонаси яратиладиган бўлса, унинг назорати Туркия томонидан амалга оширилади.
Буфер зонасини яратиш бўйича музокаралар 2013 йилда Сурия инқирози оқибатида бошланган. Анқара ушбу ғояга деярли ҳар йили қайтади, лекин ҳар сафар бир қатор сабабларга кўра режалар амалга ошмайди.
Изоҳ (0)