Давлат солиқ қўмитаси ҳузуридаги Янги технологиялар илмий-ахборот маркази ходимларидан иборат делегация Жанубий Кореяда бўлиб, солиқ маъмурчилиги жараёнларига замонавий ахборот коммуникация технологияларини татбиқ этиш, маълумотларни қайта ишлаш марказини модернизациялаш бўйича тажриба билан танишди ва уларни Ўзбекистонда қўллаш имкониятларини ўрганди. Бу ҳақда «Дарё»га марказ директори Ҳаётжон Насруллоев маълум қилди.
Ташриф доирасида делегация аъзолари Plan I компанияси, Миллий ахборот-тадқиқот маркази, Тэджон Ишланмалар ва иқтисодий инновациялар маркази, Сеул Глобал стартаплар маркази, бошқа ташкилот ва идораларда бўлди.
Жанубий Корея ички ишлар ва хавфсизлик вазирлигининг Миллий ахборот-тадқиқот хизматида бўлган учрашувда мамлакат делегацияси аъзолари идоралараро маълумотларни қайта ишлаш ягона маркази фаолияти, солиқ маъмурчилигини автоматлаштириш, шунингдек, бошқа ахборот тизимларининг ўзаро ахборот алмашиш жараёнлари билан танишди.
Ўзбекистонлик мутахассислар Миллий ахборот-тадқиқот маркази фаолияти билан қизиқди. Марказда 44 та вазирлик ва идоралар, жумладан, Миллий солиқ хизматининг маълумотлари йиғилган. Марказ давлат органлари ва идораларига кечаю кундуз хизмат кўрсатиб, кунига ўртача 30 Тб маълумотни қайта ишлайди.
Барча вазирлик ва идоралар маълумотларининг бундай марказлаштирилиши йиғилган ахборотлардан самарали фойдаланиш имкониятини беради. Вазирликлар ва идоралар ўртасидаги ўзаро алоқа тезлиги бир неча баробарга ошади. Шу билан бир қаторда марказ фаолияти йилдан йилга кенгайиб, унинг таркибий бўлимлари сони ҳам ошиб бормоқда. Марказда 1058 нафар ходим ишлайди, улардан 800 нафари муҳандислар ва юқори ихтисослашган техник мутахассислардан иборат.
Давлат ва хусусий секторларда коворкинг марказларни ташкил этиш билан шуғулланадиган қатор компаниялар ва махсус марказларга ташриф чоғида ўзбекистонлик ва кореялик мутахассислар мазкур соҳада фикрлар алмашди. Хусусан, Plan I компанияси билан учрашувда коворкинг марказлар инфратузилмаси ва уларнинг фаолиятига доир маълумотлар олинди.
Музокаралар натижасида муҳандислар ва дастурчиларнинг малакасини ошириш соҳасида ҳамкорликни кенгайтириш тўғрисида келишувга эришилди, шунингдек, Ўзбекистонда Жанубий Корея инвестицияларини жалб этган ҳолда коворкинг марказ тузишга келишилди.
Жанубий Корея вакиллари АКТ соҳасида Ўзбекистонда ўтказиладиган халқаро тадбирларда иштирок этиш истагида эканликлари, шунингдек, ўзбекистонлик мутахассисларга стажировкалар ўтказиш ва уларнинг малакасини оширишда яқиндан ёрдам беришга тайёрликларини билдирди.
Изоҳ (0)