Ҳозирда мавжуд узоқ муддатли контрацептив воситалар юқори самарадорликка эга, лекин уларни қўллаш учун тиббиёт ходими ёрдами керак, таблетка кўринишидаги ҳомиладорликка қарши препаратларни эса мунтазам қабул қилиш зарур. Вақтида қабул қилмаслик туфайли уларнинг самарадорлиги ҳам камаяди.
Янги восита ҳомиладорликка қарши препаратни микроигналар ёрдамида организмга киритади. Бу восита аввалига вакциналарни танага оғриқсиз киритиш учун яратилган эди. Текширув натижалари Nature Biomedical Engineering журналида эълон қилинди.
Тажрибаларда ҳомиладорликка қарши модда киритилган микроигнали экспериментал пластирь ҳайвонларда бир марталик қўллашдан сўнг бир ой давомида ҳомиладорликдан ҳимоя қилган.
Пластирь терига бир неча секундга ёпиштирилгандан сўнг микроигналар тери ости қаватида қолади ва парчаланади, уларнинг ичидаги левоноргестрел (ҳомиладорликдан сақловчи модда) аста-секинлик билан қонга сўрила бошлайди.
Ҳомиладорликдан сақловчи бошқа препаратлар сингари пластирь ҳам аёлларнинг менструал циклини бузиш ҳисобига уларни ҳомиладорликдан ҳимоя қилади.
«Аёллар томонидан узоқ муддатли таъсирга эга турли контрацептив воситаларига катта талаб бор. Бизнинг мақсадимиз аёллар бундай воситаларни мустақил, тиббиёт ходимининг ёрдамисиз, пластирь ёрдамида, 5 секунд давомида терисига ёпиштириш орқали бир ой давомида ўзларини ҳомиладорликдан ҳимоя қилишларида кўмаклашиш», — дейди Жоржия технологик институти ходими ва мақола муаллифларидан бири Марк Прауснис.
Микроигналар сўрилиб кетувчи иплар тайёрланадиган полимердан тайёрланган бўлиб, организм учун мутлақо зарарсиз. Пластирь билан боғлиқ бошқа текширувлар шуни кўрсатдики, ундан вакциналарни танага киритишда ҳам фойдаланиш мумкин. Игналар ўлчам шу даражада кичкинаки, улар ҳеч қандай оғриқ сезгисини чақирмайди.
«Биз ҳали пластирь одамларда қандай натижалар беради билмаймиз, лекин таъсири ва зарарсизлиги исботланган гормонни қўллаётганлигимиз туфайли унинг самарадор контрацептивга айланишига умид қилиб қоламиз. Бундан ташқари, пластирни маҳаллий қўллаганда теридаги реакциялар минимал бўлишини кутяпмиз. Буни эса клиник шароитда текшириб кўриш керак», — дейди Прауснис.
Ҳайвонларда синовдан ўтказилган пластирь ўзида юзта микроигналарни тутган эди. Левоноргестрелни инсон организми учун адекват дозада юбориш учун каттароқ ҳажмдаги пластирь керак бўлади.
Ҳозирги кунда узоқ муддатли ҳомиладорликдан сақловчи воситаларни малакали тиббиёт ходимлари томонидан бачадон ичи воситалари ёки инъекция кўринишида аёл организмига киритилади ва бачадон ичи воситалари айрим аёлларда яллиғланиш касалликларини келтириб чиқаради. Бу контрацептив воситалар эффективлигига қарамай, қўллаш учун кўплаб ноқулай тарафлари бор. Агар микроигнали пластирни қўллашга рухсат берилса, у ўз-ўзидан таъсир қилувчи ҳомиладорликдан ҳимоя қилувчи, инъекция кўринишида бўлмаган биринчи воситага айланиши мумкин.
Изоҳ (0)