«Халқ сўзи Online»да Бухоро вилояти Жондор туманидаги 25-мактабгача таълим муассасасидан фоторепортаж тайёрлади. Қуйида репортаж тўлиқлигича эътиборингизга ҳавола этилади.
Мабодо ўтган асрнинг эллигинчи йиллари ҳақида фильм олинадиган бўлса, Жондор туманидаги 25-мактабгача таълим муассасаси биноси энг яхши декорация вазифасини ўташи аниқ.
«Ушот» маҳалла фуқаролар йиғинидаги боғча бир пайтлар мактаб учун «бошпана» вазифасини ҳам ўтаган эди. Бинонинг ташқи кўриниши абгорлигидан ташқари, ҳовлисини яқин атрофда яшовчилар кимўзарга эгаллаб олишгани туфайли ўйин майдончаларига ҳам жой йўқ. Бино ичига кирган заҳотингиз қулоғингизга эшитиладиган мотор шовқини иложсизликдан табиий газ қувурига ўрнатилган мосламадан чиқиб туради.
Бу қўлбола мослама қўлбола қувурдаги газни «сўриб», қўлбола печларга узатар экан. Аммо фойдасиз — ошхона муздек. Газ босими пастлигидан овқат ташқарида — қозон ўчоқда пиширилади. Ичкарида каравотлар шунақа тиғиз қўйилганки, тор ва зах хоналарда болакайлар ўз ўрнига чиқиб ётиши ҳам иложсиз.
«Боғчамиз 70 ўринга мўлжалланган. Амалда эса 80 нафар бола қатнаяпти», — дейди мудира Венера Саидова.
«Қишлоғимизда боғча ёшидаги 283 нафар болани қаерга олиб боришни билмаймиз. 200 нафар бола боғчага бориш учун навбат кутяпти. Улар орасида неварам Малика ҳам бор», — дейди маҳалла фаоли Аҳмад Имомов.
Муассасадаги аҳвол, шарт-шароит шунақа. Ҳамма нарса тўкилай-тўкилай деб турибди. Бу борада сўз кетганда, жондорлик ва пойтахтлик мутасаддилар яна аравани қуруқ олиб қочмоқчи бўлишади. Қизиқ. Бу ҳол қачонгача давом этар экан?
Изоҳ (0)