“Xalq so‘zi Online”da Buxoro viloyati Jondor tumanidagi 25-maktabgacha ta’lim muassasasidan fotoreportaj tayyorladi. Quyida reportaj to‘liqligicha e’tiboringizga havola etiladi.
Mabodo o‘tgan asrning elliginchi yillari haqida film olinadigan bo‘lsa, Jondor tumanidagi 25-maktabgacha ta’lim muassasasi binosi eng yaxshi dekoratsiya vazifasini o‘tashi aniq.
“Ushot” mahalla fuqarolar yig‘inidagi bog‘cha bir paytlar maktab uchun “boshpana” vazifasini ham o‘tagan edi. Binoning tashqi ko‘rinishi abgorligidan tashqari, hovlisini yaqin atrofda yashovchilar kimo‘zarga egallab olishgani tufayli o‘yin maydonchalariga ham joy yo‘q. Bino ichiga kirgan zahotingiz qulog‘ingizga eshitiladigan motor shovqini ilojsizlikdan tabiiy gaz quvuriga o‘rnatilgan moslamadan chiqib turadi.
Bu qo‘lbola moslama qo‘lbola quvurdagi gazni “so‘rib”, qo‘lbola pechlarga uzatar ekan. Ammo foydasiz — oshxona muzdek. Gaz bosimi pastligidan ovqat tashqarida — qozon o‘choqda pishiriladi. Ichkarida karavotlar shunaqa tig‘iz qo‘yilganki, tor va zax xonalarda bolakaylar o‘z o‘rniga chiqib yotishi ham ilojsiz.
“Bog‘chamiz 70 o‘ringa mo‘ljallangan. Amalda esa 80 nafar bola qatnayapti”, — deydi mudira Venera Saidova.
“Qishlog‘imizda bog‘cha yoshidagi 283 nafar bolani qayerga olib borishni bilmaymiz. 200 nafar bola bog‘chaga borish uchun navbat kutyapti. Ular orasida nevaram Malika ham bor”, — deydi mahalla faoli Ahmad Imomov.
Muassasadagi ahvol, shart-sharoit shunaqa. Hamma narsa to‘kilay-to‘kilay deb turibdi. Bu borada so‘z ketganda, jondorlik va poytaxtlik mutasaddilar yana aravani quruq olib qochmoqchi bo‘lishadi. Qiziq. Bu hol qachongacha davom etar ekan?
Izoh (0)